Gruna tengdabróður Assad um morð

Tengdabróðir Bashar al-Assad Sýrlandsforseta er meðal þeirra sem liggja undir grun um morðið á Rafik al-Hariri, fyrrum forsætisráðherra Líbanons. Þetta kemur fram í skýrslu þeirra sem hafa rannsakað morðið fyrir Sameinuðu þjóðirnar að sögn þýska blaðsins Stern. Blaðið segir Asef Shawkat, yfirmann sýrlensku leyniþjónustunnar liggja undir grun vegna bílsprengjuárásarinnar sem kostaði Hariri og tuttugu aðra lífið fjórtánda febrúar síðast liðinn. Skýrslan verður ekki gerð opinber fyrr en á föstudag.