Vilma orðin að fellibyl

Hitabeltisstormurinn Vilma er nú formlega orðin að fellibyl. Vindkviðurnar ná allt að eitthundrað sjötíu og sjö kílómetra hraða á klukkustund en þegar vindhraðinn er kominn í eitthundrað og nítján kílómetra á klukkustund eru óveður skilgreind sem fellibylir. Vilma gengur nú yfir Hondúras og veldur heimamönnum miklum vandræðum með úrhellisrigningu. Þar með eykst enn á vandræði íbúa Mið-Ameríku sem hafa þegar beðið mikið tjón af völdum fellibylja. Talið er að Vilma gangi yfir sunnanverðan Flórídaskaga á laugardag, svo virðist hins vegar sem hún fari framhjá ríkjunum á suðurströnd Bandaríkjanna sem urðu verst úti þegar fellibylirnir Katrína og Rita gengu yfir.