Enn í haldi Rússa

Norskum strandgæslumönnum er enn haldið nauðugum um borð í rússneska togaranum Electron sem stefnir á Múrmansk í Rússlandi eftir að norskt varðskip skipaði því að stöðva á Barentshafi vegna ólöglegra veiða. Skipið er nú komið inn í rússneska landhelgi. Fimm norsk strandgæsluskip, sem elta hafa rússneska togarann Electron, eru enn í grend við togarann en þar sem hann er inni í rússneskri landhelgi mega skipin ekkert aðhafast. Á laugardag skipaði norska strandgæslan togaranum að sigla til Tromsø og hlýddi skiptstjóri togarans í fyrstu. Þá breytti hann í skyndingu um stefnu, með eftirlitsmennina tvo um borð, og stefnir í átt til Múrmansk í Rússlandi þangað sem hann er næstum kominn. Rússnesk stjórnvöld vildu ekki blanda sér í málið eins og þeir voru beðin um að gera en norskir embættismenn funduðu í allan gærdag við rússneska ráðmenn í sendiráði þeirra í Osló. Samkvæmt norska blaðinu Aftenposten sigldi skipstjóri Electron fram og til baka við landhelgina og virtist sem hann vildi helst ekki fara inn fyrir landhelgina hver sem ástæðan fyrir því kann að vera. Talsmaður norsku strandgæslunnar segir ekkert hæft í fregnum rússneska fjölmiðla um að Norðmenn hafi skotið á togarann. Segja norsk stjórnvöld ástæðu fyrir því að ekkert hafi verið gert til að stöðva skipið sú, að aftakaveður var á hafsvæðinu norðan við Noreg og var ölduhæð átta til níu metrar. Að stöðva skipið hefði verið of hættulegt. Norsku veiðieftirlitsmönnunum heilsast vel í togaranum og fá eflaust að fara heim þegar til Múrmansk er komið.