Reiði vegna hofheimsóknar

Þegar Junichiro Koizumi, forsætisráðherra Japans, laut í gær höfði í Yasukuni-hofinu í Tókýó, sem tileinkað er minningu Japana sem látið hafa lífið í stríði, voru viðbrögðin í öðrum Asíulöndum snör og hörð: Ráðamenn í Seoul sögðu að réttast væri að aflýsa áformuðum leiðtogafundi Suður-Kóreu og Japans og í Peking var því lýst yfir með mjög afdráttarlausum hætti að hofheimsóknin væri ögrun. Grannþjóðir Japana líta málið svo alvarlegum augum vegna þess að meðal þeirra sem heiðraðir eru í Yasukuni-hofinu eru herforingjar Japana í síðari heimsstyrjöld, sem teknir voru af lífi fyrir stríðsglæpi. Þetta var fimmta heimsókn Koizumis í hofið frá því hann varð forsætisráðherra árið 2001. Hann gefur þá skýringu að hann heimsæki hofið sem einstaklingur og óbreyttur borgari og biðji fyrir friði. Hann hefur jafnframt sagt að mótmæli útlendinga gegn heimsóknunum væru óeðlileg afskipti af japönskum innanríkismálum.