Tveir jarðskjálftar í Tyrklandi

Tveir stórir jarðskjálftar skóku vesturhluta Tyrklands í morgun. Upptök skjálftanna, sem voru 5,7 og 5,9 á Richter, voru á botni Sigacik-flóa, um fimmtíu kílómetra suðvestur af hafnarborginni Izmir, þriðju stærstu borg Tyrklands. Mikil skelfing greip um sig meðal borgarbúa og slösuðust að minnsta kosti þrír við að stökkva út um glugga. Skólum hefur verið lokað í tvo daga og fólk hvatt til að halda sig frá skemmdum byggingum, þar sem búast mætti við öflugum eftirskjálftum. Yfir tuttugu þúsund manns fórust í jarðskjálfta í norðvesturhluta landsins fyrir sex árum.