Berjast fyrir togveiðibanni

Umhverfisverndarsinnum, sem berjast gegn því að togarar fái að veiða fisk, bættist liðsauki fimmtíu breskra vísindamanna í morgun, sem skora á bresk stjórnvöld að beita sér á vettvangi Sameinuðu þjóðanna fyrir alheimstogveiðibanni. Sagt er frá þessu í The Indipendent í morgun og sagt að allir helstu sjávarlíffræðingar og vistfræðingar Breta séu í hópi áskorenda. Þeir telja meðal annars upp tegundir sem séu í útrýmingarhættu vegna eyðileggingar, sem þeir segja að togveiðar valdi. Til vara skora þeir a´bresk stjórnvöld að þau beiti sér fyrir allsherjar togveiðibanni í Evrópusambandinu. Nýverið greindu fjölþjóðleg umhverfissamtök, sem berjast gegn togveiðum, frá því, að þau séu aðeins einu atkvæði frá því að fá teknar upp viðræður um bann við botnvörpuveiðum á úthöfunum, á vettvangi Sameinuþuþjóðanna. Markmið þeirra er að fá samþykkt hnattrænt bann við togveiðum, en Íslendingar hafa til þessa, ásamt naumum meirihluta, hafnað öllum slíkum tillögum. Þeir sem þekkja til áhrifamáttar umhverfisverndarsinna telja að það styttist óhjákvæmilega í einhverskonar bann við togveiðum. Hér á landi eru gerðir út hátt í hundrað togarar og fjöldi smærri togbáta og dragnótabáta. Umþaðbil helmingur alls þorskafla okkar fæst með togveiðum, 90 prósent ufsaaaflans, 70 prósent ýsuaflans, rúmur helmingur steinbítsaflans og hátt í 90 prósent grálúðuaflans. Hér eru því slíkir hagsmunir í húfi fyrir íslenska þjóðarbúið að viðmælendur Fréttastofu treystu sér ekki til að spá neitt um framtíðina ef togveiðibann yrði að veruleika. -----