Ný stjórn

Jens Stoltenberg, nýr forsætisráðherra Noregs, skipar í ráðherrastóla í Osló í dag, en ráðherralaust hefur verið í Noregi nú um helgina, þar sem síðasta ríkisstjórn sagði af sér á föstudag. Aftenposten greindi frá því í gær að Stoltenberg neitaði að gefa upp hverjir nýju ráðherrarnir væru fyrr en Haraldur Noregskonungur væri búinn að sjá listann, sem átti að gerast nú í morgun. Hann sagði þó að listinn væri skipaður sterku og góðu fólki. Enginn þeirra sem hann hringdi í afþakkaði ráðherrastól. Verkamannaflokkurinn, sem Stoltenberg tilheyrir og sem sigraði í þingkosningunum í síðasta mánuði, mun fá tíu ráðuneyti, fimm fara til Sósíalíska vinstriflokksins og Miðflokkurinn mun fá fjögur. Líklegt þykir að yfirmaður Rauða krossins í Noregi, Jonas Gahr Stöhre, verði næsti utanríkisráðherra landsins, að sögn Aftenposten, og að formaður Sósíalíska vinstriflokksins, Kristin Halvorsen, taki við embætti fjármálaráðherra.