Voru fimm daga á sporbaug

Kínverjar bjuggu sig undir komu geimfarsins Shenzhou 6 í gærdag, en búist er við lendingu farsins nú í morgunsárið. Tveir geimfarar, Nie Haisheng og Fei Junlong, voru um borð í geimfarinu, sem var skotið á loft á miðvikudag. Kínverjar voru þriðja þjóðin sem hefur sent mannað geimfar út í heim, og var þetta í annað sinn sem þeir sendu geimfar út. Hinar þjóðirnar tvær eru Rússland og Bandaríkin. Geimferðin hefur gengið vel, að sögn kínverskra yfirvalda, og ríkir mikil gleði og stolt í landinu yfir ferðinni. Seinustu fimm dagana hefur geimfarið verið á sporbaug umhverfis jörðina og jafngildir ferð þess um þremur milljónum kílómetrum. Dagblað í Beijing birti mynd af geimförunum, þar sem þeir voru sýndir senda stafrænar myndir af farinu til höfuðstöðva sinna. Báðir voru bláklæddir og sátu í afar þröngu rými fylltu af vírum og tölvubúnaði. Shenzou, sem þýðir guðdómlegt skip, var ætlað að lenda í Innri-Mongólíu nú í morgun og að sögn yfirvalda á veður á svæðinu að vera ákaflega hagstætt fyrir lendingu. Spáin næstu tvo dagana gefur fyrirheit um gott skyggni, hægan vind og þurrviðri. Sex þyrlur, fjórtán sérútbúnar bifreiðar og meira en 200 björgunarmenn munu bíða geimfarsins. Eftir lendingu áttu geimfararnir áttu von á fjörutíu mínútna heilbrigðisskoðun, auk fjórtán daga sóttkvíar. Sóttkvíin verður ekki algjör einangrun, því fjölskyldur geimfaranna mega heimsækja þá á meðan henni stendur. Kínverjar ætla sér að hefja þjálfun á kvenkyns geimförum á næsta ári.