Segir 50 þúsund deyja í Bretlandi

Landlæknir Bretlands, Sir Liam Donaldson, segir að fuglaflensa muni koma til Bretlands en ekki sé víst að hún geri það í vetur. Þá segir hann að ef hin banvæna fuglaflensuveira H5N1 stökkbreytist og fari að berast á milli manna megi búast við því að um 50 þúsund manns látist af hennar völdum í landinu. Hins vegar muni hún hafa mest áhrif í Austur-Asíu en þar hafa 65 þegar látist af völdum H5N1-stofnsins. Bresk yfirvöld hafa komið sér upp 2,5 milljónum skammta af flensulyfjum gegn veirunni nú þegar og til greina kemur að hefta ferðafrelsi fólks ef fuglaflensufaraldur brýst út í Bretlandi. Rannsóknir í Bretlandi staðfestu í gær að fuglaflensuveiran sem fannst í öndum í Rúmeníu á dögunum væri af H5N1-stofni og óttast menn nú að hann berist enn vestar með farfuglum.