Meginvörnin dugar skammt

Flensulyfið Tamiflú, meginvörnin gegn fuglaflensu, virðist ekki duga nema að litlu leyti. Mannskæð fuglaflensa hefur nú greinst í Rúmeníu og í gær var staðfest að hún hefði greinst í Tyrklandi. Í gær var gefið í skyn að fuglaflensan í Rúmeníu væri ekki mannskæði stofninn en í dag kom annað í ljós. H5N1-stofninn fannst í þremur löndum í Dónár-þríhyrningnum þar sem farfuglar frá Norður- og Mið-Evrópu eiga viðkomu á leið til og frá vetrarstöðvum sínum. Þaðan mun flensan því meðal annars berast til Evrópu. Gheorghe Flutur, lanbúnaðarráðherra landsins, bað fólk þó að sýna stillingu því yfirvöld hefðu fulla stjórn á aðstæðunum sem komnar væru upp. Einn sérfræðinga alþjóðaheilbrigðismálastofnunarinnar sagði í dag að flensuvírusinn myndi stökkbreytast, hugsanlega innan nokkurra ára, en það gæti gengið hraðar, á fáeinum vikum. Þá léki enginn vafi á að hundruð þúsunda ef ekki milljónir myndu látast. Ofan á þetta bætist að meginvörnin í baráttunni gegn fuglaflensunni, flensulyfið Tamiflú, er ekki jafn árangursríkt og talið var. Í vísindaritinu Nature, sem kom út í gær, er greint frá tilfellum í Víetnam þar sem fuglaflensuvírusinn í mannfólki var ónæmur fyrir Tamiflú. Annað lyf, Relenza, dugði þó á hann.