Níu manns í Tyrklandi ekki sýktir

Heilbrigðisyfirvöld í Tyrklandi greindu frá því í dag að níu manns, sem lagðir voru inn á sjúkrahús í vesturhluta landsins vegna gruns um að fólkið hefði smitast af fuglaflensu, hefði verið leyft að fara heim. Rannsóknir leiddu í ljós að fólkið var ekki með hina banvænu fuglaflensuveiru H5N1, en staðfest var að veiran hefði greinst í fuglum í landinu á fimmtudag. Fyrr í dag fékkst staðfest að veiran hefði einnig fundist í Rúmeníu, en rannsóknir á þremur öndum sem fundust dauðar í Dónárþríhyrningnum skammt frá Svartahafi fyrr í vikunni, leiddu þetta í ljós. Sérfræðingar Evrópusambandsins, sem funduðu vegna málsins í gær, vilja grípa til harðra aðgerða til að koma í veg fyrir útbreiðslu veikinnar um alla álfuna. Þeir vilja meðal annars takmarka aðgang almennings að vatnssvæðum þar sem villtir farfuglar eru í miklu magni og að alifuglar verði innan dyra.