Fimmtán milljónir á kjörskrá

Fimmtán milljónir Íraka hafa í dag tækifæri til að kjósa um stjórnarskrá landsins. Kosningaþátttaka er sögð góð, þrátt fyrir árásir og hótanir uppreisnar- og hryðjuverkamanna. Það sem af er degi hefur kosningin gengið vel og engar fregnir hafa borist af mannfalli meðal óbreyttra borgara. Uppreisnar- og hryðjuverkamenn hafa þó gert nokkrar árásir en öryggisgæsla er gríðarmikil til að gera þeim erfitt fyrir. Til að mynda hefur öll umferð verið bönnuð og alls eru um hundrað þúsund lögreglumenn og öryggisverðir á götum úti. Í Ramadi var samt ráðist á hersveitir og fáir voru á kjörstöðum. Í nágrannabæjum höfðu kjörstaðir ekki einu sinni verið opnaðir. Svipaða sögu var að segja í Mósúl, þriðju stærstu borg Íraks, þar sem flugmiðum var dreift þar sem fólk var hvatt til að sniðganga kosningarnar. Á þessum stöðum eru staða uppreisnarmanna sterk. Það þykir tíðindum sæta að súnnítar virðast hafa ákveðið að sniðganga ekki kosningarnar eins og þeir gerðu í stórum stíl í við þingkosningarnar í janúar. Þó að talið sé víst að mikill meirihluti þeirra sé mótfallinn stjórnarskránni þykir yfirvöldum það engu að síður skref í rétta átt að þeir skuli taka þátt í kosningunni. Einn af stærstu stjórnmálaflokkum súnníta lýsti einnig stuðningi við stjórnarskránna í vikunni. Búist er við því að stjórnarskráin verði samþykkt en fari svo að hún verði felld verður nýtt þing, sem kosið verður í desember, einungis bráðabirgðaþing eins og það þing sem nú situr, og eina verkefni þess verður þá að byrja frá grunni við samningu nýrrar stjórnarskrár.