Gripið til aðgerða innan 3 vikna

Mannskæði stofn fuglaflensunnar hefur nú fundist í Rúmeníu. Sérfræðingar Evrópusambandsins vilja grípa til aðgerða innan þriggja vikna. Á sama tíma berast af því fregnir að helsta vörnin gegn flensunni, flensulyfið Tamiflu, dugi ekki til. Rannsóknir hafa staðfest að mannskæði stofninn hefur borist til Rúmeníu og var greint frá tíðindunum í morgun. Vísindamenn á breskri rannsóknarstofu höfðu tilfelli sem fundust í Rúmaníu í vikunni til skoðunar og komust að þessari niðurstöðu. Þetta staðfestir enn frekar að banvæni stofninn hefur borist til Evrópu. Sextíu hafa týnt lífi í Asíu af völdum fuglaflensunnar þó að hún berist sjaldan frá dýrum í menn. Það voru þrjár endur sem fundust dauðar í Dónár-þríhyrningnum skammt frá Svarta hafinu sem reyndust vera sýktar af banvæna stofninum. Yfirvöld í Rúmeníu sem og sérfræðingar Evrópusambandsins segjast hafa gert ráð fyrir því versta þegar í upphafi og því hafi verið gripið til hörðustu ráðstafana þó að þá hafi ekki verið ljóst hvort að um mannskæða stofninn væri að ræða. Í Dónár-þríhyrningnum á fjöldi fugla sér viðkomu á leið til og frá sumarstöðvum í Evrópu. Næsta vor fara þessir fuglar meðal annars til Rússlands, Pólands, Þýskalands og Norðurlanda. Sérfræðingar Evrópusambandsins, sem funduðu vegna málsins í gær, vilja grípa til harðra aðgerða til að koma í veg fyrir útbreiðslu veikinnar um alla álfuna. Þeir vilja meðal annars takmarka aðgang almennings að vatnssvæðum þar sem villtir farfuglar eru í miklu magni og alifuglar verða að vera innan dyra. Alífuglabændur verða einnig bólusettir og fá leiðbeiningar um hvernig þeir geti áttað sig á smituðum fuglum hratt. Í grein í vísindatímaritinu Nature, sem birt var í gær, var því haldið fram að flensulyfið Tamiflu dugi alls ekki alltaf í baráttunni við fuglaflensuna. Bent er á að ónæmi hafi fundist í sjúklingum með fuglaflensuna í Víetnam og því sé líklegt að finna verði fleiri ráð og beyta í baráttunni gegn flensunni.