Neyðarfundur um fuglaflensu

Neyðarfundur um viðbrögð við fuglaflensu verður haldinn í Brüssel í dag. Öruggt þykir að flensan breiðist út um Evrópu næsta vor. Níu eru undir ströngu eftirliti í Tyrklandi vegna ótta við fuglaflensu. Fjörutíu dúfur í eigu þeirra drápust á hálfum mánuði og vaknaði þá grunur um fuglaflensu. Líkurnar á smiti í mannfólk þykja litlar en í kjölfar þess að mannskæði stofn flensunnar fannst í Tyrklandi í gær þykir ástæða til að gera ítrustu varúðarráðstafanir. Sérfræðingar alþjóða heilbrigðisstofnunarinnar segja tíðindin frá Tyrklandi þýða auknar líkur á smiti í mannfólk. Þeir ítreka þó að enn sé H5N1-stofninn ekki stökkbreyttur þannig að hann sé bráðsmitandi, heldur séu líkurnar á smiti frá dýrum í menn ennþá tölfræðilega litlar. Þeir telja engu að síður ástæðu til varúðarráðstafana, ekki síst þar sem alífuglum er slátrað. Evrópskir sóttvarnasérfræðingar funda í Brüssel í dag, enda þykir enginn vafi leika á því að fuglaflensan berist til Evrópu næsta vor, þegar farfuglar koma til sumardvalar af svæðum þar sem flensan hefur nú þegar greinst. Líkurnar á að mannskæði stofninn H5N1 berist um leið eru mun meiri eftir að hann fannst í Tyrklandi.