Khodorkovskí sé við Volgu

Rússneski olíujöfurinn Míkhaíl Khodorkovskí hefur verið sendur í fangabúðir í Saratov-héraði við ána Volgu þar sem hann mun afplána átta ára dóm fyrir fjár- og skattsvik. Þetta hefur Interfax-fréttastofan eftir ónefndum heimildarmönnum innan fangelsisins. Greint var frá því á dögunum að Khodorkovskí, sem stofnaði olíurisann YUKOS, hefði verið fluttur frá fangelsi í Moskvu eftir að áfrýjun á máli hans var vísað frá en yfirvöld vildu ekki greina frá því hvar hann væri niðurkominn. Nú hefur hins vegar komið í ljós að hann er í fangelsi í bænum Engels sem er 720 kílómetra suðaustur af Moskvu. Khordorkovskí hefur alla tíð haldið því fram að ákærur á hendur honum hafi verið runnar undan rifjum stjórnvalda þar sem Vladímír Pútín Rússlandsforseti hafi álitið hann hættulegan keppinaut á sviði stjórnmálanna en rússnesk yfirvöld segja hann hins vegar ótíndan glæpamann.