Feðgar létust í sprengingu

Tveir eru látnir eftir að sprengja sprakk í húsi í Óðinsvéum í Danmörku. Svo virðist sem maður hafi stytt sér aldur og banað syni sínum um leið. Sprengingin varð um hádegisleytið í gær í Blangsted-hverfinu í Óðinsvéum. Enn er ekki alveg ljóst hvað gerðist en svo virðist sem maður hafi gengið inn í húsið með plastsprengiefni vafið um mittið á sér. Þegar inn var komið sprengdi hann sig í loft upp og fórst sonur hans með honum í sprengingunni. Kona sem var jafnframt í húsinu slasaðist alvarlega en hún er talin vera móðir drengsins. Sprengingin var svo öflug að þakið lyftist upp af húsinu og múrsteinar þeyttust í allar áttir. Talið er að maðurinn hafi notað handsprengju til að koma sprengingunni af stað. Jyllands-Posten hefur eftir lögreglunni í Óðinsvéum að engar líkur séu á að um hryðjuverk hafi verið að ræða heldur sé persónulegur harmleikur á ferðinni. Maðurinn var ekki búsettur í húsinu, einungis barnsmóðir hans og sonur. Talið er að skilnaður þeirra hafi valdið því að maðurinn greip til þessara örþrifaráða. Að sögn Hermanns Overgaard, lögreglufulltrúa, skrifaði maðurinn skilnaðarbréf stuttu áður en hann greip til þessa ráðs. "Það kemur skýrt fram að ástæðan fyrir verknaðinum var persónuleg. Ég held að skilnaðurinn sé orsökin." TV2 sjónvarpsstöðin á Fjóni hefur eftir nágrönnum mannsins að hann hafi verið í danska hernum en verið nýkominn heim frá Bosníu þar sem hann var við friðargæslustörf. Lögregla hefur hvorki viljað staðfesta að þessi ógæfusami maður hafi verið hermaður né að hann hafi stolið sprengiefninu frá hernum eins og getgátur eru um. Enn á eftir að bera formlega kennsl á líkin en lögregla hættir sér ekki inn í húsið fyrr en sprengjusérfræðingar hersins hafi gengið úr skugga um að ekki sé hætta á frekari sprengingum.