2 létust í sprengingu í Danmörku

Karlmaður og barn týndu lífi og fjórir slösuðust, þar af einn alvarlega, þegar kraftmikil sprenging varð í húsi í Óðinsvéum í morgun. Sprengingin var svo mikil að þakið lyftist af og þaksteinar flugu í allar áttir. Lögreglan í Óðinsvéum greindi Jótlandspóstinum frá því að sprengju hefði verið komið fyrir í húsinu en ekki leikur grunur á hryðjuverkum. Lögreglan mun hafa grun um hvað var á seyði en vill ekki greina frá því á þessari stundu. Fréttastofan Ritzau hefur hins vegar heimildir fyrir því að maður hafi framið sjálfsmorð með þessum hætti og danska Stöð 2 greinir frá því að talið sé að allt að kíló af sprengiefni hafi verið notað. Þar er einnig greint frá því að það hafi verið faðir og sonur sem týndu lífi. Í húsinu bjó dönsk fjölskylda. Sprengjusérfræðingar danska hersins hafa verið kallaðir á vettvang og hús í nágrenninu hafa verið rýmd í varúðarskyni.