Bush velur íhaldsmann í Hæstarétt

George W. Bush Bandaríkjaforseti útnefndi á þriðjudag John G. Roberts í embætti hæstaréttardómara, en þetta er í fyrsta sinn í áratug sem nýr maður er skipaður í Hæstarétt Bandaríkjanna. Repúblikanar fögnuðu valinu á Roberts en demókratar eru lítt hrifnir, enda hefur Roberts skapað sér orðstír fyrir að vera mjög íhaldssamur. Staðfesti öldungadeild Bandaríkjaþings, þar sem repúblikanar eru í meirihluta, útnefningu Roberts verður hann eftirmaður Söndru Day O'Connor og mun ráða yfir oddaatkvæði í dómstól sem er klofinn milli tveggja fylkinga; annarrar frjálslyndrar og hinnar íhaldssamrar. Bush bauð Roberts starfið símleiðis í hádeginu á þriðjudag og tilkynnti síðan þjóðinni um ákvörðun sína í sjónvarpsávarpi um kvöldið. Bush sagði að Roberts myndi "framfylgja stjórnarskránni í þaula lagalega en ekki gerast löggjafi úr dómarasætinu". Roberts, sem er fimmtugur að aldri, er dómari í áfrýjunardómstól District of Columbia en var áður lögmaður og flutti sem slíkur alls 39 mál fyrir Hæstarétti. Næsta skref í útnefningarferlinu eru vitnaleiðslur fyrir dómsmálanefnd öldungadeildarinnar, en þær munu væntanlega hefjast öðru hvoru megin mánaðamótanna ágúst-september. Talsmenn demókrata á þingi boðuðu að í staðfestingaryfirheyrslunum myndu þeir fara vel ofan í saumana á ferli Roberts. Engu að síður er þess vænst að áform Bush gangi eftir um að greidd verði atkvæði í þinginu um staðfestingu Roberts í embætti tímanlega fyrir 3. október næstkomandi, en þá hefst nýtt starfsmisseri dómstólsins. Allt frá því Bush tók fyrst við forsetaembættinu fyrir fjórum og hálfu ári hafa ráðgjafar hans beðið eftir tækifæri til að skipa nýjan dómara í Hæstarétt. Tækifærið gafst fyrst er O'Connor tilkynnti 1. júlí síðastliðinn að hún hygðist fara á eftirlaun. Þá blandaði forsetinn sér persónulega í málið og setti saman lista yfir ellefu manns sem til greina kæmu í embættið. Bush hitti Roberts á föstudag og komst sem sagt í gær að þeirri niðurstöðu að hann væri rétti maðurinn í starfið.