Forskot kristilegra minnkar

Kristilegu flokkarnir í Þýskalandi halda miklu forskoti á stjórnarflokkana, jafnaðarmenn og græningja, í nýjustu skoðanakönnuninni sem niðurstöður voru birtar úr á miðvikudag. Kosið verður til þings í Þýskalandi í september. Aðeins hefur bilið milli fylkinganna þó minnkað. Í síðustu viku mældust Kristilegir demókratar (CDU) og systurflokkurinn Kristilega sósíalsambandið (CSU) í Bæjaralandi með 46 prósenta fylgi, en nú mælist það 44 prósent samkvæmt könnun viðhorfsrannsóknastofnunarinnar Forsa. Jafnaðarmannaflokkur Gerhards Schröders kanslara mælist óbreytt með 27 prósentustiga fylgi en græningjar bæta við sig einu stigi og mælast nú með 8 prósent. Nokkrum tíðindum þykir sæta að heil ellefu prósent kjósenda segjast nú styðja nýtt klofningsframboð sósíalista, sem með Oskar Lafontaine í brjósti fylkingar bjóða fram í samfylkingu með arftaka austur-þýska kommúnistaflokksins PDS. Frjálslyndir demókratar, sem vænst er að muni mynda samsteypustjórn með kristilegum eftir kosningar, mælast með sjö prósenta fylgi.