Dómari í máli Saddams myrtur

Íraskur dómari og lögmaður, sem unnu við dómstólinn sem ætlað er það hlutverk að rétta yfir Saddam Hussein og aðra meðlimi stjórnar hans, voru myrtir af óþekktum byssumönnum að því er ættingjar hinna myrtu greindu frá í gær. Þeir voru feðgar og af minnihlutaþjóðflokki Kúrda. Þessar fréttir bárust daginn eftir að dómstóllinn, sem starfar með leynd í skjóli gríðarlegra öryggisráðstafana, stefndi fimm fyrrverandi aðstoðarmönnum einræðisherrans fyrrverandi fyrir réttinn fyrir meinta glæpi gegn mannkyni. Fregnir af morðunum bárust um sama leyti og tvær bílsprengjur sprungu í Bagdad. Þær urðu tíu íröskum hermönnum að bana og særði tugi til viðbótar. Fyrstu sprengjunni var beint að íraskri herstöð í miðborginni. Þar létust sex og 25 særðust. Seinni bílsprengjan sprakk klukkustund síðar við eftirlitsstöð í suðurhluta höfuðborgarinnar. Þar féllu fjórir hermenn, að sögn lögreglu.