Óskaði Hitler til hamingju

Þekktur breskur blaðaútgefandi af aðalsættum óskaði Adolf Hitler til hamingju með innlimun hluta Tékkóslóvakíu á sínum tíma og hvatti nazistastjórnina til að láta til skarar skríða gegn Rúmeníu. Þetta kemur fram í breskum ríkisskjölum sem leynd var létt af á þriðjudag. Bréfið frá Rothermere vísigreifa, sem átti dagblaðið Daily Mail, lenti í höndum breskra leyniþjónustumanna sem höfðu auga með þýskum útsendara sem vann fyrir vísigreifann. Að Rothermere væri hliðhollur nazistum var vel vitað fyrir síðari heimsstyrjöld, og hann studdi eindregið friðkaupastefnu Neville Chamberlains, þáverandi forsætisráðherra Bretlands, gagnvart Hitlersstjórninni. Rothermere, langafi núverandi eiganda Daily Mail, hafði ráðið Stephanie Hohenlohe-Waldenburg-Schillingfürst prinsessu sem milligöngumanneskju í samskiptum við Hitler og aðra forkólfa Þriðja ríkisins. Rothermere lést árið 1940.