Rice í óvæntri heimsókn í Írak

Condoleezza Rice, utanríkisráðherra Bandaríkjanna, kom í óvænta heimsókn til Mósúl í Írak í morgun, en hún er að hefja ferðalag um Miðausturlönd. Aðspurð um ástæðu heimsóknarinnar sagði Rice að hún vildi hvetja stjórnmála- og trúarhópa til að leggja niður deilur og vinna að einingu innan landsins, en þingkosningar eru fyrirhugaðar í Írak eftir um mánuð.

Rice mun í ferð sinni heimsækja Barein, Sádi-Arabíu, Ísrael og sjálfsstjórnarsvæði Palestínumanna þar sem hún mun ræða við stjórnir landanna um umbætur á sviði efnahags- og stjórnmála. Þá er búist við því að hún þurfi að svara erfiðum spurningum um meint leynifangelsi Bandaríkjanna víða um heim, en Bandaríkjastjórn hefur hingað til hvorki neitað né játað fullyrðingum um tilvist þeirra.