Íranar standa við ummæli sín um Ísrael

Fátt bendir til að Íranar verði reknir úr Sameinuðu þjóðunum vegna ummæla forseta landsins um að réttast væri að þurrka Ísrael út af landakortinu. Íranar standa við ummælin og segja þetta hafa verið stefnu Írans gagnvart Ísrael um langt skeið.

Forsetinn, Mahmoud Ahmadinejad sagði á miðvikudaginn að það væri réttast að þurrka Ísrael út af landakortinu, til að koma á friði fyrir botni Miðjarðarhafs. Þá sagði hann jafnframt að ný alda árása frá Palestínu á næstunni myndi líklega sjá til þess að honum yrði að ósk sinni.

Leiðtogar hvaðanæva að úr heiminum fordæmdu ummælin í gær og víða hafa sendiherrar Írans verið teknir á teppið og spurðir út í ummælin.

Á fundi leiðtoga Evrópusambandsins í gær var málið tekið upp og allir sammála um að ummælin væru algjörlega óréttlættanleg. Enginn hefur hins vegar enn tekið undir óskir Ísraelsmanna um að reka beri Írana úr Sameinuðu þjóðunum.

En þó að Írönum verði ekki refsað á þann máta er ljóst að enn harðar verður nú tekið á kjarnorkuáætlun þeirra. Bæði Bandaríkjamenn og stærstu ríki Evrópu hafa lagt hart að Írönum að láta af þróun kjarnorku, en án árangurs. Nú geta leiðtogar þessara ríkja hins vegar haldið því fram með góðu móti að Ísraelsmönnum stafi bein ógn af hugsanlegum kjarnavopnum Írana.

Í morgun barst yfirlýsing frá íranska sendiráðinu í Moskvu, þar sem reynt var að draga úr ummælum forsetans. Hann hafi ekki ætlað sér að tala með þessum hætti og skapa þannig alþjóðlegar deilur.

Þúsundir Írana hafa hins vegar safnast saman í höfuðborginni Teheran í dag og hrósað forsetanum og gengið um með mótmælaskilti gegn Ísrael og Bandaríkjunum. Forsetinn sjálfur hélt stuttávarp fyrir framan mótmælendurna, þar sem hann sagðist standa að fullu leyti við orð sín. Þau væru orð írönsku þjóðarinnar og þó að vestrænar þjóðir hefðu fullan rétt á að hafa sína skoðun, væru viðbrögðin við ummælunum algjörlega óréttmæt.