Unglingur handtekinn vegna hótana

Lögregla í Árósum handtók í gær 17 ára pilt fyrir að hóta teiknurum hjá danska blaðinu Jótlandspóstinum lífláti vegna mynda af spámanninum Múhameð sem birtust í blaðinu. Myndirnar, sem voru tólf talsins og birstust í blaðinu 30. september, vöktu mikla reiði hjá múslímum í Danmörku sem sögðu þær guðlast og gengu um 3500 þeirra um götur Kaupmannahafnar og mótmæltu þeim á föstudag. Gekk þetta svo langt að teiknararnir fengu líflátshótanir og greip Jótlandspósturinn til þess ráðs að ráða öryggisverði til að gæta þeirra. Talið er að fleiri en unglingurinn, sem handtekinn var, standi á bak við hótanirnar, en drengurinn hefur verið úrskurðaður í þriggja vikna gæsluvarðhald vegna málsins.