Bandaríkjamenn yfirgefi ekki Íraka

Bandaríkjamenn munu ekki yfirgefa Íraka eins og þeir yfirgáfu Víetnama í stríðinu þar á sínum tíma. George Bush, forseti Bandaríkjanna, lýsti þessu yfir fyrir stundu. Hann fagnaði kosningunni um stjórnarskrá landsins og sagði hana skref í lýðræðisátt. Bush ræddi í útvarpsávarpi sínu einnig bréf sem sagt er vera frá Ayman al-Zawahri, næstráðanda al-Qaida. Bréfið á hann að hafa sent Abu Musab al-Zarqawi, stjórnanda samtakanna í Írak. Þar hvetur Zawahri Zarqawi til að undirbúa yfirtöku íslamskrar ríkisstjórnar þegar Bandaríkjamenn hrökklast frá Írak. Vísar hann til fordæmisins í Víetnam. Bush sagði í ávarpi sínu að þetta sýndi svo að ekki yrði um villst að al-Qaida vildi gera Írak að griðarstað hryðjuverkamanna og að takmarkið væri að breiða út íslamska öfgastefnu í Miðausturlöndum. Allt byggði þetta á því að Bandaríkjamenn flýðu af hólmi á ný, en það myndi ekki gerast. Bandaríkjamenn myndu hvorki flýja né gleyma skyldum sínum.