Yfir 38 þúsund látnir í Pakistan

Pakistönsk yfirvöld telja nú að yfir 38 þúsund manns hafi látist af völdum jarðskjálftans sem skók Suður-Asíu fyrir viku, en það er þrettán þúsundum fleiri en talið var í upphafi. Talsmaður Pakistanshers segir að talan hafi hækkað þar sem komið hafi í ljós að fjölmargir hefðu látist í afskekktum héruðum sem björgunarmenn komust ekki til fyrr en nokkrum dögum eftir skjálftann. Þá er tala slasaðra komin upp í 60 þúsund. Óveður er nú á hamfarasvæðunum og hamlar það töluvert björgunarstarfi þar sem þyrlur hafa ekki komist með hjálpargögn til hinna þurfandi. Hjálparsamtök óttast að fólk verði úti í óveðrinu en talið er að 3,3 milljónir manna séu heimilislausar eftir skjálftann. Hafa samtökin sérstakar áhyggjur af börnum sem glíma nú við kulda, vannæringu og jafnvel sjúkdóma.