Al-Qaida liðar vilja breiða út óöldina

Al-Qaida í Írak vill breiða óöldina þar út til nágrannaríkjanna, samkvæmt leyniskjölum sem fundust á föllnum aðstoðarmanni Zarqawis, leiðtoga samtakanna. Al-Qaida ber ábyrgð á þremur árásum í Amman í Jórdaníu í gær, þar sem nærri sextíu manns af fjölmörgum þjóðernum féllu.

Jórdanía hefur verið ótrúlega friðsælt land sé horft á kortið og spáð í nágrannaríkin. En það breyttist í gærkvöld þegar sjálfsmorðsárásir al-Qaida liða kostuðu fimmtíu og sex lífið. Um 100 manns særðust. Árásirnar voru gerðar á þrjú alþjóðleg hótel í höfuðborginni Amman, Grand Hyatt, Radisson SAS og Days Inn hótelin.

Ekki leið á löngu uns yfirlýsing frá al-Qaida í Írak var birt á Netinu. Þar sagði að ljón samtakanna hefður gert árás á valin skotmörk, sem jórdanski einræðisherrann hefði breytt í skjólshús fyrir óvini trúarinnar, gyðinga og krossfara; skotmörk sem væru miðstöðvar svika og hórdóms. Hótelin voru ekki síst vinsæl meðal ferðamanna frá Ísrael en þeir sem féllu og særðust komu alls staðar að.

Í sjálfu sér koma hryðjuverkin ekki á óvart. Jórdanar eru nánir bandamenn Bandaríkjamanna sem veita landinu gríðarlega aðstoð. Jórdanía er í fjórða sæti yfir þau ríki sem fá mesta aðstoð frá Bandaríkjunum. Amman er miðstöð erlendra kaupsýslumanna og diplómata og miðstöð umferðar til og frá Írak. Nærri hálf milljón Íraka býr í landinu, gamlir stuðningsmenn stjórnvalda og stuðningsmenn uppreisnaraflanna í Írak.

Og leiðtogi al-Qaida í Írak er Jórdani, Abu Musab al-Zarqawi. Hann var dæmdur í fimmtán ára fangelsi þar árið 1996 en sleppt eftir að Abdullah konungur veitti honum sakaruppgjöf. Hans er nú leitað og hafa Bandaríkjamenn lagt tuttugu og fimm milljónir dollara honum til höfuðs.