Úkraína fái að semja um NATO-aðild

Viktor Jústsjenko, forseti Úkraínu, sagðist í gær vonast til að viðræður um aðild landsins að Atlantshafsbandalaginu gætu hafist á vori komanda. Ennfremur sagði hann að fríverslunarsamningur við Evrópusambandið gæti orðið að veruleika innan 12-15 mánaða. "Hjarta Evrópu er í Úkraínu og Evrópa getur ekki lifað án hjarta síns," sagði Jústsjenko í ræðu hjá hinni virtu alþjóðlegu ráðgjafarstofnun Chatham House í Lundúnum. Þangað var Jústsjenko boðið til að taka við viðurkenningu stofnunarinnar fyrir þátt sinn í að koma á þeim tímamótabreytingum í úkraínskum stjórnmálum sem kölluð hefur verið "appelsínugula byltingin" og að sjá til þess að það umrót ylli ekki átökum í ­Evrópu­. Elísabet Englandsdrottning afhenti Jústsjenko viðurkenninguna. Jústsjenko átti síðan fund með Tony Blair, forsætisráðherra Bretlands sem þetta misserið gegnir formennskunni í ESB, til að ræða möguleika Úkraínu á ESB-aðild. NATO hefur eflt samstarf sitt við Úkraínu eftir "appelsínugulu byltinguna" í fyrra, en hefur þó ekki gefið neitt út um það hvort eða hvenær landið gæti fengið aðild.