Omri Sharon semur við saksóknara vegna spillingarmáls

Elsti sonur Ariels Sharons, forsætisráðherra Ísraels, sem ákærður er fyrir spillingu í tengslum við fjáröflun fyrir kosningabaráttu föður síns hefur náð samkomulagi við saksóknara. Omri Sharon er gefið að sök að hafa komið á fót gervifyrirtækjum til þess að dylja ólögleg framlög í kosningasjóð föður hans fyrir leiðtogakosningar í Likud-bandalaginu árið 1999, en Sharon eldri sigraði í kosningunum og varð í kjölfarið forsætisráðherra Ísraels. Omri hefur viðurkennt skjalafals, að hafa framið meinsæri og að hafa brotið fjármögnunarlög stjórnmálaflokka en á móti fellur ákæruvaldið frá ákærum um fjársvik og trúnaðarrof. Omri hefur setið á þingi fyrir Likud-bandalagið í nokkurn tíma en útlit er fyrir að hann þurfi að segja af sér þingmennsku vegna ákæranna. Hann gæti átt yfir höfði sér allt að sjö ára fangelsi verði hann sakfelldur.