Maður drepinn í Englandi

Einn maður var stunginn til bana þegar átök brutust út milli ungmenna í borginni Birmingham á Englandi í gærkvöldi. Átökin brutust út í einu hverfa Birmingham í kjölfar fundar sem boðað hafði verið til vegna árásar á 14 ára gamla stúlku, sem sagt er að hafi verið nauðgað af asískum innflytjendum. Minnst þrír særðust í látunum. Um hundrað lögreglumenn voru sendir á vettvang til að reyna að skakka leikinn, en ekki vildi betur til en svo að ungmennin réðust á lögreglumennina. Æst ungmennin kveiktu í bílum og létu öllum illum látum. Samkvæmt breskum fjölmiðlum særðist einn lögreglumaður þegar hann reyndi að stilla til friðar, en múrsteinum var hent í átt til þeirra og þeim ógnað með brotnum flöskum.