117 manns létust

Samband við vélina, sem var af gerðinni Boeing 737-200, rofnaði skömmu eftir flugtak frá flugvellinum í Lagos. Í fyrstu var talið, að um helmingur þeirra, sem voru um borð, hefði lifað af slysið, en svo reyndist ekki vera, því enginn hefur fundist á lífi. Flak vélarinnar fannst nokkrum klukkustundum eftir slysið, í héraðinu Kishi Oyo, sem er í um 200 kílómetra fjarlægð frá Lagos.

Vélin var í eigu flugélagsins, Bellview Airlines í Nígeríu, og meðal þeirra sem voru um borð, voru háttsettir nígerískir embættismenn. Mikill eldur kviknaði á slysstaðnum og dreifðist brak úr vélinni langar leiðir.

Björgunarmenn segja aðstæður mjög slæmar og þeir telja ólíklegt að nokkur finnist á lífi. Mikil sorg ríkir í Nígeríu vegna slyssins og hafa þúsundir sótt moskur og kirkjur til þess að biðja fyrir fórnarlömbunum og aðstandendum þeirra.

Flugslys hafa verið tíð að undanförnu, en þetta er sjötta farþegavélin sem ferst á aðeins þremur mánuðum.