Dánartalan gæti tvöfaldast

Kofi Annan, framkvæmdastjóri Sameinuðu þjóðanna, segir dánartölu vegna jarðskjálftanna í Pakistan og Indlandi tvöfaldast á næstunni, verði hjálp til fórnarlamba hamfaranna ekki aukin. Nú þegar hafa 80 þúsund látist. Annan segir nauðsynlegt að alþjóðasamfélagið bregðist við hörmungum hraðar en gert hefur verið og leggi enn frekar af mörkum til hjálpar fórnarlömbum hamfaranna, áður en það verður of seint. Annan sagði á blaðamannafundi sem haldinn var í gær að enn vantaði yfir 400 þúsund tjöld sem þola vetrarhörkuna sem framundan er í Kasmír, matar- og drykkjarbirgðir sem og lyf og öryggisbúnað af ýmsu tagi. Þá sagði hann mun fleiri þyrlur vanta, vörubíla og peninga til að byggja skýli fyrir allt að þrjár milljónir manna sem misst hafa heimili sín. Auk látinna er talið að yfir 70 þúsund manns hafi slasast í jarðskjálftunum og hefur enn ekki náðst til hluta þeirra vegna lélegrar færðar, veðurs og skorts á hjálpargögnum. Annan mun halda fund í Genf í næstu viku til að biðja ríkisstjórnir heimsins að gera allt sem í þeirra valdi stendur svo viðeigandi hjálp berist til fórnarlambanna. Alþjóðlega heilbrigðisstofnunin greindi frá því í dag að 17 stífkrampatilfelli hafi komið upp á jarðskjálftasvæðunum í Pakistan, þar af þrjú banvæn. Reynt er nú að bólusetja eins marga og hægt er en stífkrampi er bakteríusýking sem veldur alvarlegum vöðvakrampa og getur valdið því að sjúklingurinn kafnar.  NATO hefur svarað kalli Annans og ákveðið að senda fjölda flugvéla til bjargar að minnsta kosti tíu þúsund manns frá stöðum sem erfiðast hefur verið að komast á. Þá munu verða sendir fleiri matarbakkar, drykkir og lyf til að sporna við enn frekara mannfalli en orðið hefur.