Sjúkrahúsin lömuð

Um tuttugu þúsund heilsugæslustarfsmenn í Níkaragva lögðu niður störf í gær til að leggja áherslu á kröfur sínar um hærri laun og betri tækjabúnað á spítölum og heilsugæslustöðvum landsins.

Krefjast læknar allt að 140 prósenta launahækkunar en venjubundin mánaðarlaun þeirra eru um 28 þúsund íslenskar krónur. Hjúkrunarfólk og annað starfsfólk heilsugæslunnar krefst einnig umtalsverðra launahækkana. Þá eru kröfur gerðar um bættan tækjabúnað á spítölum, sem margir hverjir eru aðeins búnir einföldustu tækjum sem völ er á.