Lá í líkhúsi í rúm tvö ár

Bresk yfirvöld rannsaka nú hvernig á því standi að lík ungs manns lá í líkhúsi í tvö ár án þess að reynt væri að bera á það kennsl. Á meðan beið fjölskylda hans á milli vonar og ótta um hvað orðið hefði um ástvin þeirra.

Sean Hutchinson, frá Vestur-Jórvíkurskíri, drukknaði í júlí 2003 og fannst lík hans nærri Kent nokkrum vikum síðar. Að sögn BBC var það hins vegar ekki fyrr en fyrr á þessu ári sem DNA-rannsókn á því fór fram og var foreldrum Hutchinson svo afhent líkið í fyrradag til jarðsetningar.