Uppnám vegna þingforseta

Viðræður um myndun samsteypustjórnar hægriflokkanna tveggja sem unnu þingkosningarnar í Póllandi í síðasta mánuði virðast vera farnar út um þúfur. Donald Tusk, leiðtogi markaðshyggjuflokksins Borgaravettvangs (PO), segist ekki sjá neina möguleika á að halda viðræðunum áfram eftir að stærsti flokkurinn, Lög og réttlæti, kom því í gegn að fulltrúi hans yrði þingforseti.

Tusk, sem tapaði í úrslitaumferð forsetakosninga á sunnudaginn fyrir frambjóðanda Laga og réttlætis, sagði að stjórnarmyndunarviðræðurnar hefðu siglt í strand eftir að meirihluti þingmanna á pólska þinginu kusu Marek Jurek, þingmann Laga og réttlætis, í þingforsetaembættið. Með þessu hefði óformlegt samkomulag flokkanna tveggja um skiptingu æðstu embætta verið rofið. Talsmenn Laga og réttlætis sögðu hins vegar að þeir ætluðu sér enn að mynda stjórn með Borgaravettvangi. Samanlagt hafa flokkarnir 288 sæti af 460 á pólska þjóðþinginu.