Stendur vörð um styrkina

Jacques Chirac Frakklandsforseti krafðist þess á leiðtogafundi Evrópusambandsins sem haldinn var í grennd við Lundúnir í gær að ráðamenn hinna aðildarríkjanna sýndu landbúnaðarstyrkjakerfi sambandsins "algjöra virðingu". Margir innan sambandsins þrýsta hins vegar á um að kerfið verði stokkað alveg upp í tengslum við gerð fjárlagaramma sambandsins fyrir tímabilið 2007 til 2013.

Chirac varaði líka við því að Frakkar myndu beita neitunarvaldi gegn nýjum samningum um heimsviðskipti sem gengju of langt í frjálsræðisátt hvað varðar viðskipti með búvörur.

Á vettvangi Heimsviðskiptastofnunarinnar WTO er verið að vinna að slíkum samningum. Frakkar hafa lengi staðið vörð um niðurgreiðslukerfi landbúnaðarins í ESB sem franskir búvöruframleiðendur njóta sérstaklega góðs af. Landbúnaðarkerfi ESB takmarkar einnig innflutning á búvörum frá löndum utan sambandsins. Chirac neitaði því samt að Frakkar fylgdu nú verndarstefnu sem svari við hattvæðingunni.