Hálf milljón barna deyr árlega

Ríflega tvær milljónir barna eru smitaðar af HIV-veirunni og deyr hálf milljón þeirra á hverju ári. Barnahjálp Sameinuðu þjóðanna, UNICEF, hefur skorið upp herör gegn þessari válegu veiki.

Herferð UNICEF, "Sameinumst fyrir börn, sameinumst gegn alnæmi," hófst formlega á þriðjudaginn en með henni vilja samtökin beina kastljósinu að HIV-smituðum börnum og aðstæðum þeirra.

Upplýsingar UNICEF sýna að yfir 500.000 börn látast úr alnæmi eða sjúkdómum sem af veikinni leiða á hverju ári. Meira en tvær milljónir barna eru smitaðar af HIV-veirunni en aðeins brot af þeim hefur aðgang að lyfjum sem þau þarfnast. Fimmtán milljónir hafa misst annað eða báða foreldra sína vegna alnæmistengdra sjúkdóma. Ástandið er verst í Afríku sunnan Sahara en einnig er alnæmi barna orðið verulegt vandamál í Austur-Evrópu.

Til að stemma stigu við vandanum setur UNICEF sér meðal annars þau markmið að komið verði í veg fyrir HIV-smit frá móður til barns og að börnin fái þá lyfjameðferð sem þau þurfa á að halda.