Kennarar fá 25 prósenta hækkun

Kennarar fá tæplega 25 prósenta launahækkun í þrepum til ársins 2008 samþykki þeir kjarasamning sem samninganefndir þeirra og sveitarfélaganna rituðu undir á sjötta tímanum í gær. Sigurður Geirdal, bæjarstjóri í Kópavogi, áætlar að samningurinn hækki launakostnað sveitarfélaganna vegna grunnskólakennara um þrjá milljarða út samningstímann: "Þetta eru dýrir samningar en þess virði." Birgir Björn Sigurjónsson, formaður launanefndar sveitarfélaganna í viðræðunum, segir samninganefndirnar hafa verið orðnar illa knúnar til að ná samningi. Lög Alþingis hafi beygt báðar nefndirnar til að finna lausn sem þær gætu unað við: "Ég tel að við séum hér á tæpasta vaði en vonast samt til að þetta gangi." Eiríkur Jónsson, formaður Kennarasambands Íslands, segir að horft hafi verið á þau atriði sem mest óánægja stóð um í miðlunartillögu ríkissáttasemjara og agnúarnir sniðnir af. Hann segir að yngstu kennararnir geti betur sæst við sinn hlut en miðlunartillagan hafi boðið. Kennarar haldi einnig óbreyttum verkstjórnartíma skólastjórnenda frá tillögunni. Það megi túlka sem sigur út frá þeim forsendum að staðan hafi verið þröng: "Við teljum að samningurinn sé líklegri til að skapa okkur tækifæri í framtíðinni heldur en að fá dóm á þeim forsendum sem þar voru." Unnur Kristjánsdóttir situr í samninganefnd kennara. Hún segir stöðu kennara á aldrinum 55 til 60 ára leiðrétta frá síðasta kjarasamningi: "Núna loksins í þessari síðustu útgáfu samningsins eru réttindin komin til baka eins og þau voru fyrir síðasta kjarasamning. Þetta fólk er mikið betur statt með nýjum samningi," segir Unnur: "Ég geri fastlega ráð fyrir að hann sé mikið skárri en ef farið væri fyrir gerðardóm." Samningurinn fer í kynningu. Kennarar sem og launanefndin eiga eftir að kjósa um hann. Birgi Björn segir segir afstöðu launanefndarinnar til samningsins ekki liggja fyrir: "Samninganefndin hér undirritar þetta í þeirri trú að niðurstaðan sé ásættanleg fyrir sveitarfélögin."