Fischer óskar eftir hæli

Bobby Fisher, fyrrverandi heimsmeistari í skák, hefur óskað eftir pólitísku hæli á Íslandi við sendiráð Íslands í Tókýó. Þá hefur hann jafnframt óskað eftir fyrirgreiðslu símleiðis hjá forstjóra Útlendingastofnunar.  Bobby Fischer hefur dvalið í gæsluvarðhaldi í Japan svo mánuðum skiptir og bandarísk yfirvöld hafa óskað eftir því að fá hann framseldan. Í Bandaríkjunum á Fischer yfir höfði sér fangelsisdóm fyrir að brjóta viðskiptabann með því að heyja skákeinvígi við Boris Spasský í Júgóslavíu fyrir meira en áratug síðan Fischer mun hafa hringt í sendiherra Íslands í Japan,og sent honum í kjölfarið handskrifaða beiðni um pólitískt hæli á Íslandi. Morgunblaðið birtir í dag upplýsingar úr bréfi Fischers þar sem segir að leki sé frá kjarnorkuveri í grennd við fangelsið þar sem hann situr í gæsluvarðhaldi. Hann vilji hvorki deyja vegna geislavirkrar mengunar í Japan, né í bandarísku fangelsi. Fremur vilji hann deyja frjáls maður í vinalegu þriðja landi. Samkvæmt upplýsingum frá utanríkisráðuneytinu verður beiðni Fischers um pólitískt hæli tekin til meðferðar, eins og aðrar beiðnir sem berast. Í reglum um hælisveitingu hér á landi segir hins vegar að flóttamenn skuli teljast þeir sem í heimalandi sínu séu ofsóttir vegna kynþáttar, trúarbragða, þjóðernis og aðildar að félagasamtökum eða stjórnmálaflokkum. Fischer virðist ekki uppfylla þau skilyrði. Þá er pólitískt hæli ekki veitt nema sá sem þess óskar sé staddur hér á landi. Einnig er í gildi framsalssamningur milli Íslands og Bandaríkjanna. Að óbreyttu verður því að teljast ólíklegt að skákmeistarinn fái að deyja frjáls maður hér á landi. Georg Lárusson, formaður Útlendingastofnunar, fékk símhringingu frá Fischer fyrir rúmri viku þar sem hann sóttist eftir fyrirgreiðslu. Til stofnunarinnar hefur þó hvorki borist umsókn um dvalarleyfi né hælisveitingu. Georg segir að tekin verði afstaða til umsóknar Fischers, líkt og annarra, berist hún stofnuninni á annað borð. Hann vildi að öðru leyti ekki tjá sig um málið að svo stöddu.