Faldi sig á hlöðulofti

Síðasti fanginn af fjórum sem flúði úr fangelsi í Svíþjóð var handtekinn í gær. Tony Olsson sem dæmdur er fyrir rán og morð á tveimur lögregluþjónum hafði falið sig í hlöðu á bóndabæ suður af Stokkhólmi. Hlaðan var skammt frá þeim stað sem flóttabíll þeirra félaga fannst og hinir þrír voru gripnir. Flóttinn hefur vakið upp óþægilegar minningar í Svíþjóð. Olsson var einn úr hópi fanga sem innan múranna skipulögðu bankarán sem endaði með morði á tveimur lögregluþjónum í Kisa fyrir fimm árum. Talið var að fangarnir hefðu nýtt æfingar á leikriti eftir Lars Norén sem fangarnir léku í þjóðleikhúsinu í Stokkhólmi. Uppsetningin var umdeild, bæði vegna þess að fangarnir boðuðu nasisma og einnig vegna þess að margir töldu að þjóðleikhús Svía væri að gera hetjur úr glæpamönnum. Flóttinn hefur vakið upp umræður um öryggisgæslu í sænskum fangelsum. Þótt fangarnir séu allir fundnir leitar lögreglan enn vitorðsmanna sem aðstoðuðu við flóttann.