Sjálfkjörið í bankaráðið

Sjálfkjörið var í bankaráð Íslandsbanka í gær því samkomulag náðist fyrir hluthafafund. Ekkert varð því af æsilegri baráttu um völd eins og sumir höfðu búist við. Einar Sveinsson verður áfram formaður bankaráðs, en með honum sitja þar þau Jón Snorrason, varaformaður bankaráðsins, Helgi Magnússon, Karl Wernersson, Róbert Melax, annar stofandi Lyfju og Steinunn Jónsdóttir, innanhúsarkitekt og Úlfar Steindórsson, stjórnarformaður Brúar Venture Capital, dótturfélags Straums fjárfestingarfélags. Straumur sem á rúmlega nítján prósenta hlut í bankanum naut aðeins atkvæðisréttar sem nemur níu komma níutíu og níu prósenta hlut vegna þess að Fjármálaeftirlitið hefur ekki enn gefið samþykki sitt fyrir eignarhlutnum, eins og þörf er á þegar um meira en tíu prósenta hlut er að ræða. Tveir menn drógu framboð sín til baka fyrir fundinn, Guðmundur B. Ólafsson og Ólafur B. Thors. Orri Vigfússon var kjörinn varamaður í bankaráðið en bæði viðskipti hans og Helga Magnússonar með bréf í bankanum eru til rannsóknar hjá opinberum aðilum. Lengi hefur verið barist um völd í Íslandsbanka og oft gengið mikið á. Þótt allt virðist í lukkunar velstandi þessa stundina er óvíst hve lengi það muni halda. Á markaði hefur verið talað um drauma Björgólfsfeðga um áhrif í bankanum, meðal annars hugmyndir um að sameina Straum Burðarási og að saman myndu þessi fjárfestingarfélög sölsa undir sig Íslandsbanka og skipta honum upp. Þá bárust fréttir af kaupum Baugs í Íslandsbanka í gær, og teljast það dálítil tíðindi þótt hófleg hafi verið,í ljósi forsögunnar þegar forstjóri Baugs varð ásamt félaga sínum undir í baráttu um bankann.