Þriggja mánaða fangelsi fyrir að stela málverki og skjalatösku

Karlmaður var í gær dæmdur í þriggja mánaða óskilorðsbundið fangelsi í Héraðsdómi Reykjavíkur fyrir að hafa stolið málverki á Hótel Loftleiðum fyrir um fjórum árum og skjalatösku í verslun Pennans í fyrra.

Hæstiréttur staðfesti áframhaldandi gæsluvarðhald

Hæstiréttur staðfesti í gær áframhaldandi gæsluvarðhaldsúrskurð yfir Litháa sem handtekinn var nýverið í tengslum við innflutning annars Litháa á fíkniefnum hingað til lands. Um var að ræða mikið magn amfetamíns í vökvaformi.

Náttúruminjasafn Íslands eitt þriggja höfuðsafna

Náttúruminjasafn Íslands verður eitt þriggja höfuðsafna á Íslandi ásamt Þjóðminjasafninu og Listasafni Íslands nái nýtt frumvarp menntamálaráðherra þar að lútandi fram að ganga. Í framhaldinu stendur svo til að finna Náttúrugripasafninu nýjan stað.

Vill persónulega liðveislu fyrir fatlaða hér á landi

Persónuleg liðsveisla fyrir fatlaða er hagkvæmara fyrir ríkið en rekstur stofnana fyrir fatlaða og skilar sér margfalt til þeirra sem hennar njóta. Reynsla af persónulegri liðveislu fyrir fatlaða hefur gefið góða raun í Danmörku en þar ráða fatlaðir sjálfir sína aðstoðarmenn.

Ráðherra telur sig vanhæfan til að skipa hæstarréttardómara

Björn Bjarnason dómsmálaráðherra telur sig vanhæfan til að skipa í embætti hæstarréttardómara sem auglýst hefur verið til umsóknar. Þetta kemur fram á heimasíðu ráðherrans.

Nærri 58 þúsund manns hafa skilað inn framtölum á Netinu

57.656 höfðu skilað inn skattframtali á Netinu í kvöld klukkan níu en frestur til að skila inn framtölum til ríkisskattstjóra rennur út á miðnætti. Þetta kemur fram á heimasíðu ríkisskattstjóra, rsk.is.

26 þúsund fermetra verlsunarhúsnæði í Reykjanesbæ

Smáratorg, sem rekur meðal annars Rúmfatalagerinn, hyggst reisa tuttugu og sex þúsund fermetra verslunarhúsnæði í Reykjanesbæ. Félagið hefur þegar fest kaup á lóð í bænum en áætlað er að framkvæmdir hefjist strax á næsta ári og að verslunarhúsnæðið verði tilbúið árið 2008.

Mikill áhugi á matreiðslu í Rimaskóla

Matreiðsluáhugi í Rimaskóla er með því mesta sem þekkist í grunnskólum landsins en árlega taka tugir nemenda þátt í kokkakeppni skólans. Kokkameistarakeppnin var haldin í þriðja skiptið í dag og óhætt er að segja að þar leynist margur meistarakokkurinn. Heimilisfræði er valfag í 9. og 10. bekk og er fagið vinsælasta valfag skólans en 89 nemendur eru í matreiðslu.

Eigum að berjast gegn stríðsvélinni

Stjórn Ungra vinstri grænna fagnar því að Bandaríkjaher skuli loksins vera á förum og krefst þess að stjórnvöld hugsi gáfulega og taki forystu sem friðelskandi þjóð. Í á´lyktun sem stjórnin sendi frá sér segir að þrátt fyrir að Ísland sé að losna við stríðstól úr landi þá sé ætlun Bandaríkjahers að nota þessi tól til að myrða fólk í öðrum löndum. Segir ennfremur að Ísland eigi að berjast gegn stríðsvélinni en ekki verahuglaust, sérhlífið og sjálfselskt.

Þjónusta fjölmennasta atvinnugreinin á Íslandi

Framlag þjónustu til landsframleiðslu eykst ár frá ári og þjónusta er fjölmennasta atvinnugreinin á Íslandi. Iðnaðar-og viðskiptaráðherra segir mikilvægt að efla ólíkar starfsgreinar til að auka sveigjanleika í efnahagslífinu.

Hvatti til að tollum yrði aflétt af íslenskum fiski

Einar K. Guðfinnsson sjávarútvegsráðherra heimsótti í dag fyrirtæki í sjávarútvegi á Humberside svæðinu í Bretlandi og hitti að máli bæði borgarstjórann í Hull og bæjarstjórann í Grimsby. Á fundi með hagsmunaaðilum í sjávarútvegi hvatti sjávarútvegsráðherra þá til að leggja Íslendingum lið í að þrýsta á Evrópusambandið að aflétta tollum sem eru á nokkrum íslenskum sjávarafurðum, sem fluttar eru út til sambandslandanna. Jafnframt því að aflétt yrði útflutningsálagi á ferskan fisk frá Íslandi.

Vöknum með AFA

Stofnfundur Aðstandendafélags aldraðra, AFA, verður haldinn í Félagsheimili eldri borgara í Hafnarfirði á sunnudaginn. Félagið verður opið öllum sem láta sig hagsmunamál aldraðra varða og er ætlað að vekja Íslendinga til umhugsunar um málefni aldraðra.

Hagkaup greiði starfsmanni bætur vegna slyss

Héraðsdómur Reykjavíkur dæmdi í dag Hagkaup til þess að greiða starfsmanni bætur vegna slyss sem hann varð fyrir á lager verslunarinnar í Kringlunni. Maðurinn féll til jarðar þegar álstigi sem hann notaði við tiltekt gaf sig með þeim afleiðingum af maðurinn handleggsbrotnaði og hlaut varanlegt heilsutjón.

Skýrsla Danske Bank er full af rangfærslum

Hlutabréf þriggja stærstu bankanna hríðféllu í dag eftir að skýrsla Danske Bank um íslensk efnahagsmál var birt. Ingólfur Bender, hagfræðingur, segir skýrsluna fulla af rangfærslum.

Vaktakerfi flugumferðarstjóra verður breytt

Flugmálastjórn segist vilja stytta vaktir í flugstjórnarmiðstöðinni í Reykjavík, en fimm ára samningaviðræður hafi ekki skilað árangri. Því komi til greina að breyta vaktakerfinu einhliða. Ágreiningurinn sé fyrir félagsdómi og reynt verði að fá félagsdóm til að útkljá öll deilumál aðila.

Lægsta tilboð í Héðinsfjarðargöng 5,7 milljarðar króna

Tékkneskur verktaki, Metrostav, í samstarfi við Háfell, átti lægsta tilboð í Héðinsfjarðargöng, upp á 5,7 milljarða króna. Tilboð þeirra reyndist 720 milljónum króna undir kostnaðaráætlun.

Hátt í 55 þúsund hafa skilað framtölum á Netinu

Frestur til að skila inn skattframtölum til ríkisskattstjóra rennur út á miðnætti í kvöld en klukkan sex höfðu 54.780 skilað inn framtali á Netinu samkvæmt upplýsingum á heimasíðu ríkisskattstjóra, rsk.is.

Kemur til greina að Nató taki við varnarhlutverki

Framkvæmdastjóri NATÓ telur koma til greina að sambandið taki við varnarhlutverki Bandaríkjamanna hér á landi. Í gær ræddi hann málefni Íslands við George Bush, forseta Bandaríkjanna, Condoleezzu Rice, utanríkisráðherra, og Donald Rumsfeld, varnarmálaráðherra.

Höfundur Draumalandsins stendur við ummælin

Höfundur Draumalandsins dregur ekkert í land, þótt Alcoa kalli hann ósannindamann. Alcoa sé umsvifamikill þáttakandi í hönnun og þróun á stríðsvélum, ekki aðeins venjulegur hráefnisframleiðandi. "Alcoa framleiðir til dæmis Tomahawk eldflaugarnar, Bradley skriðdreka sem eru svona allra ljótustu djöflarnir sem við sjáum í Íraksmyndunum. Við erum hluti af mjög stóru og grimmu samhengi," segir Andri Snær sem skrifaði bók sína til að stinga á kýlum í samfélaginu.

Segir suma fjölmiðla og stjórnarandstöðu hlaupa á eftir erlendum rangfærslum

Forsætisráðherra sagði á Alþingi í dag að það væri áhyggjuefni hversu viljugir sumir fjölmiðlar og stjórnarandstaðan hefðu verið að hlaupa á eftir rangfærslum erlendra aðila um íslensk efnahagsmál.

Fráleitt að Alfreð bjóði orku til álvers í Helguvík

Vinstri grænir í Reykjavík segja fráleitt að Alfreð Þorsteinsson, stjórnarformaður Orkuveitu Reykjavíkur, bjóði orku til álvers í Helguvík án samráðs við stjórn Orkuveitunnar eða borgarstjórn. Alfreð segir að nýtt álver sé langáhrifaríkasta aðferðin til að bæta atvinnuástandið á Suðurnesjum og það eina sem er fast í hendi.

Umhverfissvið Rvk óskar eftir umsóknum

Umhverfisráð Reykjavíkur hefur auglýst eftir tilnefningum til Umhverfisviðurkenningar Reykjavíkurborgar 2006. Til greina kemur fyrirtæki eða stofnun sem leitast við að haga rekstri sínum í samræmi við reglur um sjálfbæra þróun. Viðurkenningin kom í hlut Borgarholtsskóla árið 2005 og var það í níunda sinn sem hún var veitt.

Virðisaukalágmarkið hækki

Lágmark virðisaukaskattskyldrar sölu verður hækkað úr tvö hundruð og tuttugu þúsundum í fimm hundruð þúsund nái frumvarp fjármálaráðherra fram að ganga á Alþingi.

Tilboð í Héðinsfjarðargöng opnuð í dag

Tékkneska vertakafyrirtækið Metrostav a.s. og Háfell ehf. stóðu sameiginlega að lægsta tilboði í gerð Héðinsfjarðarganga en tilboð í göngin voru opnuð í dag. Tilboðið hljóðaði upp á rúma fimm komma sjö milljarða og sem er um áttatíu og níu prósent af áætluðum verkkostnaði. Fimm tilboð hafa borist í verkið og tvö frávikstilboð en göngin verða þrír komma sjö kílómetrar á lengd á milli Siglufjarðar og Héðinsfjarðar og um sex komma níu kílómetra löng milli Ólafsfjarðar og Héðinsfjarðar. Næst lægsta tilboðið hljóðaði uppá rúma fimm komma átta milljarða króna þannig að litlu munar á tilboðunum tveimur.

Varnarmál Íslands rædd á fundi í Frakklandi

Geir H. Haarde, utanríkisráðherra, ræddi varnarmál Íslands á fundi sínum með Philippe Douset-Blazy, utanríkisráðherra Frakklands í dag. Utanríkisráðherra er staddur í vinnuheimsókn í París í boði franska starfsbróður síns.

Tvær snjóbyssur að gjöf

Á aðalfundi Sparisjóðs Svarfdæla í gær var Skíðafélagi Dalvíkur fært að gjöf andvirði tveggja snjóbyssa til að stækka snjóframleiðslukerfi félagsins í Böggvisstaðafjalli.

Vilja að stuðlað verði að farsælum starfslokum

Framkvæmdarstjórn Starfsgreinasamband Íslands krefst þess að stjórnvöld hefjist strax handa við stefnumörkun um atvinnuuppbyggingu á Suðurnesjum. Í ályktun sem framkvæmdarstjórnin sendi frá sér segir að gera verði þá kröfu til íslenskra stjórnvalda og Bandaríkjahers sem atvinnurekanda að stuðlað verði að farsælum starfslokum allra starfsmanna og leita til leiða til að draga úr afleiðingum uppsagnanna með félagslegri aðstoð.

Diskó og pönk á Árbæjarsafninu

Pönktónleikar á Árbæjarsafninu hljómar kannski fáránlega, en gæti þó orðið staðreynd innan fárra vikna. Í júní verður opnuð sýning á safninu þar sem fjallað verður um menningu ungs fólks í Reykjavík á árunum 1975-85, og diskóið og pönkið verður haft í forgrunni.

Sök skipt til helminga

Héraðsdómur Reykjavíkur hefur dæmt Hagkaup að greiða karlmanni um þrítugt rúma milljón króna í bætur vegna vinnuslyss sem hann varð fyrir síðla árs 2002. Honum er þó gert að bera nokkra ábyrgð sjálfur og var því sök skipt til helminga.

Ólík afstaða Halldórs og Geirs varðandi uppsögn varnarsamningsins

Össur Skarphéðinsson, þingmaður Samfylkingarinnar, segir athyglisvert að formenn stjórnarflokkanna hafi ólíka afstöðu til möguleikanna á uppsögn varnarsamningsins við Bandaríkin. Þá segir hann utanríkisráðherra hafa sýnt ótrúlegt fyrirhyggjuleysi um öryggismál á hafi.

Bæjarstjóri fundaði með starfsmönnum

Árni Sigfússon, bæjarstjóri Reykjanesbæjar, fundaði í gær með íslenskum starfsmönnum varnarliðsins í Keflavík. Mikil ólga var meðal starfsmanna sem margir óttast atvinnuleysi í haust.

Urgur í starfsmönnum varnarliðsins

Urgur er í starfsmönnum varnarliðsins en tollgæslan hefur eflt eftirlit sitt á umferð um aðalhlið varnarstöðvarinnar og leitar nú ítarlega í mun fleiri bílum en áður.

Gagnrýna stjórnarformann OR

Stjórn Vinstri grænna í Reykjavík telur fráleitt að Alfreð Þorsteinsson, stjórnarformaður Orkuveitu Reykjavíkur, vilji að Orkuveitan hafi forgöngu um frekari skuldbindingar um orkusölu til álvers í Helguvík, án samráðs við stjórn Orkuveitunnar og borgarstjórn.

Kemur til greina að NATO taki við vörnum Íslands

Jaap de Hoop Schaffer, framkvæmdastjóri Atlantshafsbandalagsins telur að til greina komi að Atlandshafsbandalagið taki yfir varnarhlutverkið sem Bandaríkjamenn hafa sinnt til þessa. Hann ræddi málefni Íslands við George Bush forseta og Condoleezzu Rice, utanríkisráðherra í gær.

UVG segja óþarfa að verja Ísland með hervaldi

Félag ungra vinstri grænna á Akureyri fagnar löngu tímabærri ákvörðun Bandaríkja Norður-Ameríku að hverfa af landi brott með herafla sinn. Í tilkynningu frá félagionu segir að ungir visntri grænir séu sammála því að óþarfi sé að verja Ísland með hervaldi og telja landið mun öruggara eftir brotthvarf Bandaríkjahers. Augljóst sé að varnarsamningur við Bandaríkin sé einnig óþarfur og ber að segja honum upp tafarlaust.

Ekkert eftirlit með kaupum á vinnuvélaolíu

Ekkert eftirlit er með því hverjir kaupa vinnuvélaolíu og í hvaða tilgangi en slík olía er rúmlega 43% ódýrari en dieseolían. Yfir 18 sölustaðir á höfuðborgarsvæðinu selja slíka olíu í sjálfsölum sínum.

Öflugar loftvarnir mikilvægar

Björn Bjarnason segir enn gríðarlega mikilvægt að á Íslandi séu öflugar loftvarnir og að ekki sé búið að útiloka að hér verði herþotur í framtíðinni. Þetta kom fram á málþingi félags stjórnmálafræðinga í Háskóla Íslands í gær.

Draumalandið kynnt

Húsfyllir var í Borgarleikhúsinu í gærkvöld þar Andri Snær Magnason rithöfundur kynnti nýja bók sína, Draumalandið. Bókin, sem hefur undirtitilinn Sjálfshjálparbók handa hræddri þjóð, hefur þegar vakið töluvert umtal þrátt fyrir að hún hafi fyrst komið út í gær.

Vinnsla hefst aftur í vikunni

Vinnsla hefst á ný á morgun eða á fimmtudag í frystihúsi Fossvíkur á Breiðdalsvík en það skemmdist töluvert í eldi fyrir rúmri viku.

Ekki hægt að lesa úr fjárlagafrumvarpi að framlögum yrði hætt

Íslensku sendinefndinni í varnarviðræðunum við Bandaríkjamenn var sagt að ekki væri hægt að lesa úr fjárlagafrumvarpi Bandaríkjastjórnar að hætta ætti fjárframlögum til varnaliðsins á Miðnesheiði.

Kemur til greina að segja upp varnarsamningnum

Forsætisráðherra segir vel geta komið til greina að segja varnarsamningi Íslands og Bandaríkjanna upp en að minnsta kosti þurfi að endurskoða hann. Þetta sagði hann á fundi í Stapanum í gærkvöldi. Forsætisráðherra sagði Jaap de Hoop Scheffer, framkvædastjóra Atlandshafsbandalagsins, telja nauðsynlegt að hafa viðbúnað á Íslandi.

Fjögurra bíla árekstur í Svínahrauni

Einn var fluttur á slysadeild með minniháttar áverka eftir fjögurra bíla árekstur í Svínahrauni í gærkvöldi. Tengivagn á bíl bilaði með þeim afleiðingum að fólksbíll sem kom á eftir fór út af þegar ökumaðurinn reyndi að stöðva bíl sinn og valt.

Ekki bara eymd í Afríku

Homo, félag mannfræðinema, stendur nú fyrir fyrirlestraröð til að kynna heimsálfuna Afríku í allri sinni litadýrð og margbreytileika. Erna María Jensdóttir, formaður félags mannfræðinema segir fyrirlestraröðina tilkomna vegna ranghugmynda margra Íslendinga um Afríku.

Ríkisstörfum hefur fækkað í sumum skattumdæmum

Störfum á vegum ríkisins hefur fækkað töluvert í sumum skattumdæmum á síðustu átta árum sem er þvert á áætlanir ríkisstjórnarinnar. Á þetta benti þingmaður Frjálslynda flokksins í umræðum á Alþingi í dag og vildi draga Valgerði Sverrisdóttur ráðherra byggðamála til ábyrgðar. Hún sagði hins vegar málið ekki á sinni könnu.

Vinnsla hefst á ný í Breiðdalsvík

Vinnsla hefst á ný á miðvikudag eða fimmtudag í frystihúsi Fossvíkur á Breiðdalsvík en það skemmdist töluvert í eldi fyrir rétt rúmri viku. Að sögn Ríkharðs Jónssonar, framkvæmdastjóra Fossvíkur, verða störf jafnmörg í frystihúsinu eftir sem áður.