Neyðarstjórn Palestínu tekin við völdum

Neyðarstjórn tók við völdum í Palestínu í dag í andstöðu við Hamassamtökin sem eru með meirihluta á þingi. Mahmoud Abbas sniðgekk þannig ákvæði í stjórnarskrá sem takmarkar völd forsætisráðherrans. Ísraelar fagna neyðarstjórninni og segja hana boða nýtt upphaf friðarumleitana.

Forsætisráðherra boðar niðurskurð í aflaheimildum í þjóðhátíðarræðu

Geir H. Haarde, forsætisráðherra, talaði um kvótakerfið og úthlutun aflaheimilda í þjóðhátíðarræðu sinni á Austurvelli. Sagði hann nauðsynlegt að fundin yrði leið til að sætta sjónarmið fiskifræðinga og útgerðarmanna.

Fluttur til Reykjavíkur eftir útafakstur

Flytja þurfti tvítugan karlmann með sjúkrabíl til Reykjavíkur eftir að bíll sem hann ók fór útaf veginum undir Ólafsvíkurenni á Snæfellsnesi um klukkan hálf sjö í morgun. Ökumaður þykir hafa sloppið vel miðað við aðstæður.

Sofnaði undir stýri

Bílvelta varð skömmu fyrir klukkan sjö í morgun á hringveginum um 50 kílómetra austan við Mývatn. Ökumaður bifreiðarinnar sofnaði undir stýri með fyrrgreindum afleiðingum. Einn farþegi var í bílnum en engan sakaði.

Leysa Johnston úr haldi í dag

Hamasliðar tilkynntu í morgun að breski fréttamaður BBC, Alan Johnston, yrði leystur úr haldi mannræningja seinna í dag. Nú eru þrír mánuðir síðan fréttamanninum var rænt á Gasa af öfgahóp sem kallar sig Her Islams. Í byrjun mánaðarins sendu þeir út myndband þar sem Alan sagðist vera við góða heilsu og að vel væri farið með hann.

Þriðji Minnesota sexburinn látinn

Þriðji sexburinn sem í Minnesota í Bandaríkjunum í síðustu viku lést í nótt. Sexburarnir fæddust einungis 10 klukkustundum áður en aðrir sexburar komu í heiminn í Phoenix í Arisona. Þeir eru allir á lífi. Sexburarnir í Minnesota fæddust 18 vikum fyrir tímann. Ástand þeirra þriggja sem áfram lifa er alvarlegt.

Abbas setur nýja ríkisstjórn í dag

Mahmoud Abbas forseti Palestínu hefur gefið út tilskipun um að ákvæði í stjórnarskrá sem takmarka völd forsetans skuli sniðgengin svo hann geti komið á fót neyðarstjórn. Aðstoðarmenn forsetans sögðu að með því gæti hann útilokað Hamasliða úr ríkisstjórninni. Það myndi gera forsetanum kleyft að koma nýrri ríkisstjórn á fót án samþykkis þingsins.

Gripinn glóðvolgur við prófsvindl

Sonur leyniþjónustumanns í Búlgaríu olli miklu uppnámi þegar hann notaði hátæknibúnað föður síns til að svindla á prófi. Á sama tíma voru einhverjar viðamestu öryggisráðstafanir í gangi í höfuðborginni vegna heimsóknar George Bush Bandaríkjaforseta til Sofiu.

Ólæti á Akureyri

Erilsamt var hjá lögreglunni á Akueyri aðra nóttina í röð, en einn lögreglumanna orðaði það svo að miðbærinn hefði verið eins og vígvöllur. Að sögn lögreglunnar á Akureyri máttu tíu manns gista fangageymslur hennar í nótt vegna ýmissa brota.

Bílaverkstæði á Selfossi í ljósum logum

Allt tiltækt slökkvilið á Selfossi var kallað út laust eftir klukkan hálfníu í kvöld vegna bruna í verksmiðjuhúsnæði við Gagnheiði á Selfossi. Í húsinu er bílaverkstæði og þar inni geymdir gaskútar. Óttast var að þeir kynnu að springa og var því ákveðið að rýma svæðið í kringum húsið.

Æstur múgur barði konu til dauða og kveikti í annarri

Um tvö þúsund ævareiðir íbúar í bænum Camotan í Gvatemala börðu konu til dauða og kveiktu í annarri vegna gruns um að þær hefðu drepið stúlku í þeim tilgangi að stela líffærum hennar. Íbúarnir tóku konurnar af lífi á torgi í miðjum bænum en lögreglunni tókst að bjarga tveimur öðrum sem múgurinn ætlaði að ráðast á.

Vilja takmarka vegi um hálendið

Stöðva ber frekari gerð uppbyggðra vega á hálendinu og takmarka gerð annarra vega eins og kostur er að mati höfunda hálendisvegaskýrslu Landverndar. Skýrsluhöfundar leggja til að gert verði heildstætt kerfi um flokkun vega á hálendinu til að auka öryggi vegfarenda og til að draga úr hættu á landsspjöllum.

Segjast hafa sannanir fyrir því að Íranir útvegi Talibönum vopn

Bandaríkjamenn segjast hafa óyggjandi sannanir fyrir því að Íranar útvegi Talíbönum í Afganistan vopn í baráttunni við herlið Afgana og Atlantshafsbandalagsins. Viðbrögð annarra þjóða eru varfærin við þeim fréttum en Bandaríkjamenn hafa áður lagt fram óyggjandi sannanir á alþjóða vettvangi.

Athuga hvað fór úrskeiðis hjá velferðarsviði Reykjavíkurborgar

Farið verður ítarlega yfir það hvað fór úrskeiðis hjá velferðarsviði Reykjavíkurborgar þegar ekki var orðið við hjálparbeiðni aldraðra hjóna fyrir rúmri viku síðan. Sex dagar liðu frá því óskað var eftir aðstoð velferðarsviðsins þar til hjálpin barst.

Grunaður um akstur undir áhrifum fíkniefna

Lögreglan í Borgarnesi stöðvaði um klukkan sjö í kvöld ökumann vegna gruns um akstur undir áhrifum fíkniefna. Maðurinn hafði áður verið sviptur ökuskírteini og var því án ökuréttinda.

Tveir stútar teknir á Akureyri í dag

Tveir menn voru teknir vegna ölvunaraksturs á Akureyrir um þrjúleytið í dag. Að sögn lögreglunnar höfðu mennirnir farið of snemma af stað eftir gleðskap næturinnar.

Ósátt við framgöngu íslenskra stjórnvalda

Fjölskylda breskra hjóna sem létust í bílslysi á Íslandi í ágúst 2005 er afar ósátt við framgöngu íslenskra yfirvalda í málinu. Dánardómstjóri á Englandi hefur óskað eftir gögnum um af hverju mál gegn bílstjóra annars bíls í slysinu var fellt niður, en rannsókn sýndi að hjólbarðar hans voru ekki í lagi.

Fleiri hundruð konur í brúðarhlaupi í Boston

Fleiri hundruð konur hlupu hið svokallaða brúðarhlaup í Boston í Bandaríkjunum í gær þegar útsala á brúðakjólum hófst þar í borg. Ár hvert heldur Filene´s basement mikla útsölu á brúðarkjólum og kjólum fyrir brúðarmeyjar. Fleiri hundruð kvenna voru í biðröðinni í morgun, en þær fyrstu byrjuðu að bíða klukkan þrjú í nótt að staðartíma.

Aðeins þrjú bílastæði við Rétttrúnaðarkirkjuna

Í nýju deiliskipulagi fyrir Mýrargötusvæðið er gert ráð fyrir byggingu kirkju fyrir rússnesku rétttrúnaðarkirkjuna, en aðeins sett skilyrði um þrjú bílastæði við húsið. Íbúar á svæðinu hafa gert athugasemdir við þetta enda töluverður skortur á bílastæðum í hverfinu.

Þjóðhagslega hagkvæmt að hafa frítt í strætó

Það er þjóðhagslega hagkvæmt að hafa frítt í strætó. Þetta er niðurstaða rannsóknarverkefnis sem nokkrir nemendur við Háskólann á Bifröst unnu í vetur.

Lögregla kallar út mannskap á Akureyri

Lögreglan á Akureyri hefur kallað menn úr sumarleyfum vegna aukins viðbúnaðar í kvöld og nótt, vegna skrílsláta í bænum í gærkvöldi. Sjö líkamsárásir komu til kasta lögreglunnar á Akureyri síðast liðna nótt, en um helgina fara fram svokallaðir bíladagar á Akureyri.

Samvinnutryggingar lánuðu ekki til fjárfestinga einstaklinga

Þórólfur Gíslason, stjórnarformaður Eignarhaldfélagsins Samvinnutrygginga, segir ekkert hæft í því að einstaklingar hafi haslað sér völl í íslensku atvinnulífi með lántökum frá félaginu. Félagið hafi ekki lánað fé til einstaklinga til fjárfestinga heldur fjárfest sjálft í hlutabréfum og lítilsháttar í fasteignaskuldabréfum.

Aldrei fleiri brautskráðir frá Háskóla Íslands

Aldrei hafa fleiri verið brautskráðir í einu frá Háskóla Íslands en á annað þúsund kandídatar útskrifuðust þaðan í dag. Kennaraháskólinn brauðskráði einnig 476 kandídata í dag en þessir skólar verða sameinaðir á næsta ári. Hafist verður handa við byggingu vísindagarða háskólans næsta haust.

Lýsa yfir stuðningi við Mahmoud Abbas

Hinn svokallaði kvartett, sem samanstendur af Evrópusambandinu, Rússlandi, Sameinuðu þjóðunum og Bandaríkjunum, hefur lýst yfir stuðningi við neyðarstjórn Palestínu og Mahmoud Abbas forseta landsins. Abbas ákvað í síðustu viku að slíta stjórn Palestínumanna undir forystu Hamas samtakanna.

Þúsundir kvenna tóku þátt í kvennahlaupinu

Hátt í 20 þúsund konur tóku þátt í hinu árvissa kvennahlaupi víða um land í dag. Það mátti horfa yfir mikið kven-mannhaf á Garðatorgi áður en gríðarlegur fjöldi kvenna lagði í hann skömmu upp úr hádegi í dag í ágætis veðri.

Lést af völdum fuglaflensunnar

Ríkissjónvarpið í Víetnam greindi frá því í dag að karlmaður á þrítugsaldri hafi látist í þar í landi í vikunni af völdum fuglaflensunnar. Er þetta fyrsta dauðsfallið í Víetnam vegna fuglaflensunnar síðan árið 2005. Ekki er vitað hvernig maðurinn sýktist af flensunni.

Nýtt kílógramm í smíðum

Vísindamenn í Ástralíu vinna nú hörðum höndum að því að móta nýjan alþjóðlegan staðal kílógramms. Mun hann leysa af hólmi platínustöng frá árinu 1889 sem varðveitt er í Frakklandi. Eins og títt er meðal málma tærist stöngin með tímanum og hefur því lést nokkuð.

Gagnrýna Landsvirkjun fyrir óeðlileg vinnubrögð

Landsvirkjun hefur augljóslega beitt sveitarstjórn Flóahrepps miklum þrýstingi til að ná fram markmiðum fyrirtækisins varðandi Urriðafossvirkjun að mati stjórnar Vinstrihreyfingarinnar græns framboðs. Þetta kemur fram í yfirlýsingu frá stjórn flokksins sem gerir einnig alvarlegar athugasemdir við vinnubrögð Landsvirkjunar í málinu.

Þrír létu lífið í eldsvoða í Noregi

Þrír létu lífið þegar eldur kviknaði í sumarbústað við bæinn Ask um 40 kílómetra norðaustur af Osló í Noregi í nótt. Faðir og sonur náðu við illan leik að forða sér. Faðirinn brenndist hins vegar illa þegar hann fór aftur inn í brennandi bústaðinn til að reyna bjarga eiginkonu sinni, sex ára gamallri dóttur og ömmu barnanna.

Allt að 500 prósent fjölgun hitabylgja

Ef losun gróðurhúsalofttegunda fer fram sem horfir mun mannskæðum hitabylgjum, líkum þeim sem skullu á Miðjarðarhafslönd árið 2003, fjölga um 200 til 500 prósent á þessari öld. Mest mun hitna í Frakklandi.

Sungu íslenska helgisöngva fyrir Ítali

Húsfyllir var í kirkju heilags Mikaels og Gaetano í Flórens á Ítalíu í gær þegar stúlknakór Reykjavíkur söng íslenska og alþjóðlega helgisöngva. Var kórnum vel fagnað í lok tónleikanna.

Sarkozy með ólöglega innflytjendur í vinnu

Franska lögreglan rannsakar nú hvernig stendur á því að tveir ólöglegir innflytjendur fengu vinnu við að endurgera opinbert húsnæði Nicolas Sarkozy, forseta Frakklands. Mennirnir voru handteknir í vikunni en þeir höfðu þá framvísað skírteinum með fölsuðu dvalarleyfi.

Yfir þúsund kandídatar brautskráðir frá Háskóla Íslands

Alls voru 1.056 kandídatar brautskráðir frá Háskóla Íslands í dag og hafa þeir aldrei verið fleiri. Flestir útskrifuðust frá félagsvísindadeild og næst flestir frá viðskipta- og hagfræðideild. Þá voru 35 kandídatar brautskráðir í fyrsta skipti úr meistaranámi í verkefnastjórnun frá verkfræðideild.

Óveður veldur miklum skemmdum í Þýskalandi

Mikið óveður gekk yfir Þýskaland í nótt og olli það miklu tjóni á eignum. Víða flutu ár yfir bakka sína og hrifsaði vatnselgurinn með sér bíla og annað lauslegt. Yfirvöld í Berlín lýstu yfir neyðarástandi en þar flæddi vatn víða inn í kjallara húsa. Ekki er vitað til þess að fólk hafi slasast í óveðrinu.

Amason toppar Níl

Brasilískir vísindamenn réðust á dögunum í nákvæmar mælingar á Amason fljótinu sem sýna að það er lengsta fljót í heimi. Níl hefur hingað til borið þann titil. Amason hefur hinsvegar verið alltaf verið talið vatnsmesta fljót í heimi.

Kæra 28 nafnlausa notendur spjallborðs

Tvær bandarískar konur hafa höfðað mál á hendur 28 notendum spjallborðs vegna ærumeiðinga og hótana um líkamsmeiðingar. Á spjallborðinu koma einstaklingar fram undir dulnefni og hafa konurnar krafist þess að fá allar þær upplýsingar frá umsjónarmönnum borðsins og netþjónustuaðilum sem gætu afhjúpað hina nafnlausu einstaklinga. Sérfræðingar telja fordæmisgildi málsins mikið og það muni hafa mikil áhrif á framtíð nafnlausra spjallborða á Netinu.

Fimm ára fannst í skógi eftir þrjá daga

Fimm ára gömul stúlka sem óttast var að hefði drukknað ásamt afa sínum í bátsferð í Illinois ríki í Bandaríkjunum kom björgunarsveitarmönnum á óvart þegar hún birtist í skógi skammt frá leitarstaðnum. Stúlkan var nakin og rispuð en ekki illa haldin að öðru leiti. Hún hafði nærst á mórberjum frá því á miðvikudag en óskaði eftir súkkulaðikexi þegar hún fannst.

Benedikt Erlingsson senuþjófurinn á Grímunni

Leiksýningin Dagur vonar eftir Birgi Sigurðsson var valin besta leiksýning ársins á Grímunni, íslensku leiklistarverðlaununum, í gærkvöldi. Besta leikkona í aðalhlutverki var valin Sigrún Edda Björnsdóttir fyrir hlutverk sitt í þeirri sýningu.

Átök hafin á Vesturbakkanum

Arabaþjóðir fordæma ástandið á Gaza og Vesturbakka Palestínu og hafa lýst yfir stuðningi við Mahmoud Abbas forseta landsins. Hundruðir byssumanna réðust inn í stofnanir á Vesturbakkanum þar sem átök hófust í dag. Upplýsingastjóri alþjóða Rauða Krossins segir Genfarsáttmálann hafa verið margbrotinn síðustu daga.

Þrjátíu milljarðar í nýja vasa

Rösklega fjörutíu þúsund aðilar munu skipta á milli sín um 30 milljörðum króna í haust þegar eignir Samvinnutrygginga verða færðar eigendum nýs hlutafélags sem rís á grunni gamla eignarhaldsfélagsins.

Norður Kóreumenn opna fyrir Alþjóða kjarnorkumálastofnuninni

Stjórnvöld í Norður Kóreu hafa boðið fulltrúum frá Alþjóða kjarnorkumálastofnuninni að koma aftur landsins eftir að opnað var á ný fyrir fjármuni í eigu ríkisstjórnarinnar í banka á Macau. Bandaríkjamenn frystu féð seint árið 2005 og hafa Norður-Kóresk stjórnvöld hingað til neitað að loka kjarnorkustöð sinni án þess að fá fyrst aðgang að fénu.

Þrír fluttir á sjúkrahús eftir umferðaróhapp

Tveir bílar rákust saman á Þjóðvegi 1 í Akrahreppi skammt norðan við bæinn Minni-Akrar laust eftir klukkan ellefu í gærkvöldi. Báðir bílarnir fóru útaf veginum og endaði annar þeirra á hvolfi. Ökumaður annars bílsins var fluttur á sjúkrahúsið á Akureyri en farþegi og ökumaður hins bílsins voru fluttir á sjúkrahúsið á Sauðárkróki.

Mikill erill hjá lögreglunni á Akureyri

Mikill erill var hjá lögreglunni á Akureyri í nótt en þar fara nú fram bíladagar. Mikil fjöldi ferðamanna er í bænum og öll tjaldsvæði yfirfull. Lögregla hafði vart undan við að stöðva slagsmál og ólæti en ölæði gesta á svæðinu var mikið.

Kviknaði í blaðagámum

Slökkvilið höfuðborgarsvæðisins var kallað út tvisvar í nótt og í morgun eftir að eldur kviknaði í blaðagámi. Þá barst slökkviliðinu tilkynning um klukkan hálf sex í morgun að kviknað væri í íbúð á 8. hæð í blokk við Hátún.

Lögreglan í Borgarnesi stöðvar ellefu ökuþóra

Alls stöðvaði lögreglan í Borgarnesi ellefu ökumenn í nótt vegna hraðaksturs. Sá sem fór hraðast mældist á 139 kílómetra hraða á Vesturlandsvegi við Gufuá þar sem hámarkshraði er 90 kílómetrar. Þá var einn tekinn fyrir að aka undir áhrifum fíkniefna. Allir sem voru teknir voru á leið til Akureyrar.