Ósátt við framgöngu íslenskra stjórnvalda

Fjölskylda breskra hjóna sem létust í bílslysi á Íslandi í ágúst 2005 er afar ósátt við framgöngu íslenskra yfirvalda í málinu. Dánardómstjóri á Englandi hefur óskað eftir gögnum um af hverju mál gegn bílstjóra annars bíls í slysinu var fellt niður, en rannsókn sýndi að hjólbarðar hans voru ekki í lagi.

Hjónin Julie og Benedict Taylor frá Glastonbury í Bretlandi voru á ferðalagi um Austurland og létust þegar bílaleigubíll þeirra lenti í árekstri við flutningabíl. Atvikið átti sér stað á þjóðveginum undir Hallormsstað þann 9. ágúst árið 2005.

Enska blaðið Western Gazette greindi frá því í fyrradag að aðstandendur hjónanna hefðu óskað eftir því að dánadómsstjóri í Somerset færi fram á frekari upplýsingar frá yfirvöldum hér. Rannsókn leiddi í ljós að of mikið loft hefði verið í fremri hjólbörðum vörubílsins en um 50 prósent of lítið í afturhjjólunum. Samkvæmt því var bremsuhæfni flutningabíllisins einungis um fjörtíu prósent.

Blaðið greinir frá því að vörubíllinn hafi farið yfir á vitlausan vegarhelming í beygju, en reynt að forðast árekstur við bíl hjónanna með þeim afleiðingum að hann valt.

Ekkert fannst hins vegar að bíl hjónanna. Hætt var við ákæru á hendur ökumanninum þar sem sannanir þóttu ekki nægar til að sakfella hann. Þegar fjölskyldan mótmælti var eins mánaðar kærufrestur liðinn. Á því tímabili höfðu hins vegar engar upplýsingar verið gefnar út um málið á ensku, margir mánuðir hefðu liðið þangað til það var gert. Meðal þess sem óskað er eftir eru upplýsingar frá yfirheyrslu bílstjóra flutningabílsins og ljósmynda frá slysstað.

Ekki náðist í forráðamenn Rannsóknarnefndar umferðarslysa vegna málsins.

Lárus Bjarnason sýslumaður á Seyðisfirði segir gagnrýni aðstandenna snúa að því kerfi sem er við lýði hér, en í Bretlandi gildi aðrar reglur. Í þessu tiltekna máli hafi ákvörðun niðurfellingu verið send breska sendiráðinu, á íslensku, um leið og hún var tekin. Ákvörðunin byggði á rannsókn, krufningu og öðrum gögnum.