Dularfullur sjúkdómur í mörgæsum

Dularfullur sjúkdómur sem leggst á hálfstálpaða mörgæsaunga hefur gert mikinn usla í Suðureyjum Nýja-Sjálands í stofni mörgæsa með gul augu sem eru á lista yfir tegundir í útrýmingarhættu. Áttatíu prósent unganna sem fæddust síðasta vor hafa drepist úr sjúkdómnum sem virðist ekki ógna fullorðnum fuglum.

Stakk mann til bana í Lundúnum

Óður maður drap einn og stórslasaði fimm í Lundúnum í dag. Hann gekk berserksgang í norðurhluta borgarinnar og stakk þar fólk, að því er virðist af handahófi. Fórnarlömbin voru af báðum kynjum og ólíkum kynþáttum.

Hættulegt listaverk

Listaverk sem var reist við Austurgötu í Hafnarfirði í tilefni hundrað ára afmælis rafveitunnar í bænum er varasamt að mati áhyggjufullra nágranna, sérstaklega börnum sem klifra í því.

Vilja sameinast Hafnarfirði

Rúm sextíu prósent íbúa Vatnsleysustrandarhrepps geta hugsað sér að hreppurinn sameinist öðru sveitarfélagi. Rétt tæpur helmingur þeirra telur sameiningu við Hafnarfjörð skásta kostinn en tæp þrjátíu prósent nefndu Reykjanesbæ og tólf prósent Grindavík.

Um 3 milljarðar úr jöfnunarsjóði

Framlög jöfnunarsjóðs sveitarfélaga vegna framkvæmda í sveitarfélögum með færri en tvöþúsund íbúa, við grunnskóla, íþróttahús, sundlaugar, leikskóla og vatnsveitur nema 147 milljónum á næsta ári samkvæmt áætlun félagsmálaráðuneytisins.

Borgin sameinist ekki Kjósarhreppi

Reykjavíkurborg mælir ekki með því að kosið verði um sameiningu borgarinnar við Kjósarhrepp í allsherjarkosningu um sameiningu sveitarfélaga sem verður eftir fjóra mánuði. Mörg önnur sveitarfélög víða um land hafna einnig sameiningartillögu.

Friðarviðræður komnar í strand

Friðarviðræður stjórnvalda og uppreisnarmanna í Darfur-héraði í Súdan eru komnar í strand. Á aðra milljón manna hefur misst heimili sín í héraðinu og Alþjóða Rauði krossinn óttast að með sama áframhaldi verði þrjár milljónir manna hjálparþurfi á næsta ári. Fréttamaður Stöðvar 2 var á ferðalagi í Darfur-héraði.

Júsjenkó sigurstranglegri

Spennan magnast í Úkraínu þar sem styttist í forsetakosningar - aftur. Kannanir benda til sigurs stjórnarandstöðunnar eins og síðast.

Jólaverslunin góð í ár

Þúsundir manna eru í miðbæ Reykjavíkur í kvöld að kaupa síðustu jólagjafirnar. Margir þeirra tóku þátt í friðargöngunni sem fór niður Laugaveginn á milli klukkan 18 og 19. Sigurður Jónsson, framkvæmdastjóri Samtaka verslunar og þjónustu, segir jólaverslunina í ár hafa verið góða.

4400 börn njóta stuðnings ABC

Yfir fjögur þúsund börn njóta stuðnings í gegnum ABC-hjálparstarf, þar af bættust eitt hundrað og tuttugu við nú í desember. Staðan er þannig að biðlisti er eftir að fá að styðja börn í Suður-Úganda.

Lét klóna köttinn sinn

Þegar peningum og vísindum er blandað saman er ýmislegt hægt, að því er virðist. Í dag fékk kona á Flórída níu vikna kettling í fangið í fyrsta sinn - og þó, því að kettlingurinn er nákvæmlega eins og köttur sem hún átti en er farinn á vit feðra sinna. Fyrir litla fimmtíu þúsund dollara, tæpa milljón króna, lét konan klóna kisann sinn og er nú alsæl.

Langar raðir við bílaþvottastöðvar

Gríðarlegar biðraðir hafa verið við bílaþvottastöðvar á höfuðborgarsvæðinu í dag, enda vilja flestir hafa bílinn sinn, eins og annað, hreinan um jólin.

Gleðilega hátíð

Starfsfólk Vísis óskar landsmönnum öllum gleðilegrar jólahátíðar.

Gróðurhúsaáhrifin góð fyrir sjávarútveginn

Líkur eru á að mikilvægir fiskstofnar í hafinu umhverfis Ísland muni styrkjast með hlýnun jarðar. Prófessor við Háskóla Íslands telur að hlýnunin muni hafa jákvæð, en þó ekki teljandi, áhrif á landsframleiðsluna. </font /></b />

GlaxoSmithKline gefur lyf til hjálparstarfs í Súdan

GlaxoSmithKline á Íslandi gaf nýverið lyf til hjálparstarfs í Súdan. Um er að ræða 900 pakka af Augmentin, sem er breiðvirkt sýklalyf sem samtals eru að verðmæti um 1,6 milljónir íslenskra króna

Biðin eftir Fischer lengist

Dvínandi líkur eru á því að japönsk stjórnvöld sleppi Bobby Fischer úr landi alveg í bráð eftir að málefni hans voru flutt úr útibúi útlendingastofnunar í grennd við Narita-flugvöll í gær, inn í dómsmálaráðuneytið sjálft. Kunnugir telja að það þýði vandlega og tímafreka yfirvegun.

Blair í Miðausturlöndum

Tony Blair kom seint í gærkvöldi til Ísrael en í dag mun hann eiga fundi bæði með Ariel Sharon, forsætisráðherra Ísraels, og þeim Amhed Qureia, forsætisráðherra Palestínu, og forsetaframbjóðandanum Mahmoud Abbas. Heimsókn Blairs á svæði Palestínumanna er fyrsta heimsókn þjóðarleiðtoga frá því að Jassir Arafat féll frá.

Kvótar ESB minnkaðir

Fiskveiðikvótar Evrópusambandsins verða minnkaðir á næsta ári en ekkert verður úr algjöru þorskveiðibanni á stórum svæðum eins og vísindamenn höfðu lagt til, í þeim tilgangi að koma í veg fyrir hrun stofnsins. Þessi niðurstaða náðist eftir mikið þjark hjá ráðherrum sambandsríkjanna.

Stjörnuþokur í fæðingu

Vísindamenn hjá bandarísku geimferðastofnuninni NASA segjast hafa fundið stjörnuþokur í fæðingu sem gætu einn góðan veðurdag orðið jafn stórar og Vetrarbrautin. Vísindamennirnir töldu áður að fæðingartíðni stjörnuþoka - ef þannig má að orði komast - hefði minnkað en þessar fæddust í alheimi sem kominn er vel yfir miðjan aldur.

3 vikna gæsluvarðhald vegna smygls

Einn flugfarþeginn enn var gripinn með fíkniefnasendingu í Leifsstöð í fyrradag og hafa lögregla og tollgæsla lagt hald á um það bil tuttugu kíló af kókaíni og amfetamíni, sem eru sterkustu og dýrustu fíkniefnin á markaði hér.

Vonbrigði yfir ákvörðun ráðherra

Útvegsbændafélag Vestmannaeyja lýsir miklum vonbrigðum með þá ákvörðun sem samgönguráðherra tilkynnti í ríkisstjórn í gær að ferðum Herjólfs verði ekki fjölgað þannig að skipið sigli á milli lands og Eyja tvisvar á dag, alla virka daga vikunnar, eða alls þrettán ferðir í viku eins og félagið telur nauðsynlegt.

Greiddu ekki lausnargjald

Frönsk stjórnvöld neituðu því í morgun að lausnargjald hefði verið greitt fyrir tvo franska blaðamenn sem íslamskir öfgamenn slepptu úr haldi í Írak í vikunni. Jean-Pierre Raffarin, forsætisráðherra Frakklands, greindi flokksbræðrum sínum frá því að krafa um lausnargjald hefði verið sett fram en að ekki hefði verið orðið við henni.

Björgunarsveitir kallaðar út

Björgunarsveitir voru kallaðar út um miðnætti til að leita að manni sem talinn var vera á Þverárfjalli á milli Skagastrandar og Varmahlíðar. Þá var afleitt veður á svæðinu og gekk á með hríðarbyljum. Ekkert símasamband er á fjallinu og var því ekkert vitað um afdrif mannsins.

Hryðjuverkamenn handteknir á Spáni

Spænska lögreglan handtók í morgun þrjá meinta íslamska öfgamenn. Mennirnir höfðu reynt að kaupa sprengiefni. Allir eru þeir af marrokkósku bergi brotnir og voru handteknir í grennd við Barcelona. Þeir eru grunaðir um tengsl við alþjóðlegt net íslamsra hryðjuverkamanna, samkvæmt upplýsingum frá spænska innanríkisráðuneytinu.

Erfitt að bera kennsl á líkin

Marga daga tekur að bera kennsl á lík þeirra sem fórust í sprengjuárás á messatjald á herstöð í Írak í gær. Tuttugu og tveir fórust í árásinni. 

Bandaríkjamenn fastir fyrir

Dvínandi líkur eru á því að japönsk stjórnvöld sleppi Bobby Fischer úr landi í bráð eftir að mál hans lenti á borði embættismanna í dómsmálaráðuneytinu í Tókýó. Bandaríkjamenn skoða málið en fara sér hægt og segja viðmælendur fréttastofunnar litlar líkur á að þeir sleppi Fischer við refsingu. </font />

Slæmt að þagnarskylda skuli rofin

Skattrannsóknarstjóri hefur lokið rannsókn á Baugi og vísað ákveðnum þáttum skattrannsóknarinnar til Ríkislögreglustjóra. Það var Ríkislögreglustjóri sem vísaði málinu til Skattrannsóknarstjóra í fyrrahaust. Kristín Jóhannesdóttir, framkvæmdastjóri Gaums, segir slæmt að embættin hafi rofið þagnarskyldu.

Hættir við öll verkefni í Írak

Einn stærsti bandaríski verktakinn í Írak, Contrack International Inc, hefur ákveðið að hætta við öll verkefni í landinu. Fyrirtækið hefur því sagt upp samningum að virði tuga milljóna dollara þar sem kostnaður við öryggisgæslu í Írak hefur rokið upp úr öllu valdi.

Sýknaður af manndrápsákæru

Tvítugur maður var sýknaður af ákæru um manndráp af gáleysi í Héraðsdómi Reykjaness í morgun. Maðurinn var talinn hafa ekið bifreið sinni of hratt miðað við aðstæður og ekki gætt nægrar varúðar þegar árekstur við aðra bifreið olli banaslysi.

Fékk tvö ár skilorðsbundin

Nítján ára stúlka var dæmd í 14 mánaða fangelsi í Héraðsdómi Reykjaness í morgun fyrir þjófnað, hylmingu og tilraun til fjársvika. Dómurinn er skilorðsbundinn til tveggja ára þar sem stúlkan hefur snúið lífi sínu til betri vegar, hafið nám og hætt fíkniefnaneyslu og afbrotum.

Ókeypis laxveiðileyfi í Noregi

Svo kann að fara að glænýr lax leysi jólaþorskinn víða af á jólaborði Norðmanna í ár því norska fiskistofan gefur nú öllum sem vilja opin og ókeypis veiðileyfi til að veiða u.þ.b. 150 þúsund laxa sem nýverið sluppu úr fiskeldisstöð á Mæri, skammt frá Álasundi.

Flutningabíll fauk út af

Allt stefndi í að Héraðsbúar færu í jólaköttinn þegar stór flutningabíll með tengivagn, lestaður jólamat og jólapökkum til Héraðsbúa, fauk út af þjóðveginum í Lækshrauni fyrir austan Kirkjubæjarklaustur seint í gærkvöldi. Ökumanninn sakaði ekki en undirvagn bílsins stórskemmdist í hrauninu.

Hækkun bóta vegna vinnuslysa

BSRB, BHM og KÍ undirrituðu í morgun samkomulag við ríki, Reykjavíkurborg og launanefnd sveitarfélaga um ýmis réttindamál. Í því er kveðið á um hækkun bóta vegna örorku og slysa í starfi, auk þess sem samið var um hækkun iðgjalda í Fjölskyldu- og styrktarsjóð (FOS) og verður gjaldið nú 0,55% af heildarlaunum en var áður 0,41%.

Fyrsta skrefið í átt að friði

Tony Blair, forsætisráðherra Bretlands, og Mahmoud Abbas, frambjóðandi í komandi forsetakosningum í Palestínu, segja ráðstefnuna sem ráðgerð er í Lundúnum á næsta ári verða fyrsta skrefið í átt að friði fyrir botni Miðjarðarhafs.

Læknabréf send rafrænt

Læknabréf fara framvegis rafrænt milli Landspítalans og Heilsugæslunnar í Reykjavík samkvæmt samningi þessara stofnana, heilbrigðis- og tryggingamálaráðuneytsins og Theriak ehf. sem undirritaður verður í dag. Rafræn læknabréf eru liður í uppbyggingu rafrænnar sjúkraskrár á Íslandi.

Bróðirinn varð eftir í fangelsinu

Ungur fangi slapp úr sænsku fangelsi með því að skiptast á fötum við eineggja tvíburabróður sinn. Fanginn, sem er átján ára og hafði nýlega verið dæmdur í tíu mánaða betrunarvist fyrir líkamsárás og rán, var skilinn eftir ásamt tvíburabróður sínum í klefa og gekk út sem frjáls maður eftir að hafa farið í föt bróður síns.

Árs fangelsi fyrir kynferðisbrot

Rúmlega fertugur maður var dæmdur í eins árs fangelsi í Héráðsdómi Reykjavíkur í dag fyrir að særa blygðunarsemi 12 ára pilts í biðskýli við Austurberg í Reykjavík og notfæra sér andlega annmarka 17 ára pilts í kynferðislegum tilgangi á gistiheimili við Flókagötu.

Georg forstjóri Gæslunnar

Dómsmálaráðherra skipaði í dag Georg Kr. Lárusson, forstjóra Útlendingastofnunar, í embætti forstjóra Landhelgisgæslu Íslands frá og með 1. janúar næstkomandi. Georg var valinn úr hópi níu umsækjenda. Georg tekur við af Hafsteini Hafsteinssyni sem tekur við starfi skrifstofustjóra í utanríkisráðuneytinu um áramót.

Fjögurra ára fangelsi fyrir kynferðisbrot gegn fimm drengjum

Sigurbjörn Sævar Grétarsson var í dag dæmdur í fjögurra ára fangelsi í Héraðsdómi fyrir kynferðisbrot gegn fimm drengjum á aldrinum 12-14 ára. Sigurbjörn var ákærður fyrir brot gegn sjö drengjum en aðeins sakfelldur fyrir brot gegn fimm drengjanna.

Ekki truflandi áhrif

Fréttir af rannsókn lögreglu og skattyfirvalda hafa ekki áhrif á viðskipti félagsins erlendis. Þetta er mat Hreins Loftssonar, stjórnarformanns Baugs. </font /></b />

Enn dragast mál Fischers

Ekki varð af fundi Masako Suzuki, lögmanns skákmeistarans Bobby Fischer, með fulltrúum japanska utanríkisráðuneytisins í gær, en á honum stóð til að ræða mögulega lausn hans úr haldi og komu hingað til lands.

Suðað í forsætisráðherra Japans

Stuðningshópur sem vinnur að frelsun Bobby Fischer í Japan sendi í gær Junichiro Koizumi, forsætisráðherra Japans, bréf þar sem hann er hvattur til að leyfa Fischer að fara til Íslands þannig að hann sleppi við lögsókn í Bandaríkjunum.

Tölvubrot á Akureyri

Rannsóknardeild Lögreglunnar á Akureyri hefur til rannsóknar möguleg brot tölvufyrirtækis þar í bæ á höfundarréttarlögum. Uppi er grunur um að sett hafi verið upp stýrikerfi og jafnvel annar hugbúnaður á tölvur sem fyrirtækið selur án þess að fyrir lægju viðeigandi leyfi og greiðslur til rétthafa.

Vegvísir að frjálsri Palestínu

Mahmoud Abbas, leiðtogi Palestínumanna, segir að Palestínumenn vilji fylgja vegvísi að frjálsri Palestínu sem alþjóðasamfélagið styddi. Talið er víst að Abbas sigri í forsetakosningum í Palestínu á næsta ári. 

BSRB á móti tilskipuninni

BSRB hefur sent Davíð Oddssyni utanríkisráðherra umsögn um þjónustutilskipun ESB og óskað eftir því að hann kynni hana í ríkisstjórn. Í umsögninni er lagst alfarið gegn þjónustutilskipuninni enda vegi hún að undirstöðum velferðarkerfisins og grafi undan réttarstöðu launafólks.