GlaxoSmithKline gefur lyf til hjálparstarfs í Súdan

Á næstu dögum mun ACT, alþjóðaneyðarhjálp kirkna fá lyfjasendingu sem GlaxoSmithKline á Íslandi gefur til hjálparstarfsins í Súdan. Um er að ræða 900 pakka af Augmentin, sem er breiðvirkt sýklalyf sem samtals eru að verðmæti um 1,6 milljónir íslenskra króna. Það var Anna M.Þ. Ólafsdóttir fræðslu- og upplýsingafulltrúi sem tók við gjöfinni fyrir hönd Hjálparstarfs kirkjunnar á Íslandi. Stofnunin mun hafa milligöngu um að koma lyfjunum til hjúkrunarfólks í Súdan þar sem mikil þörf er fyrir lyfin. Hjálparstarf kirkjunnar er aðili að alþjóðaneyðarhjálp kirkna ACT, Action by Churches Together. Í tilkynningu frá Hjálparstarfi kirkjunnar og GlaxoSmithKlein á Íslandi segir að styrkur ACT liggi ekki síst í því að meðlimir eru kirkjur og kirkjutengd félög sem eiga rætur í því samfélagi sem nýtur aðstoðarinnar. Þetta tryggi að hjálpargögn og önnur aðstoð komist til þeirra sem helst þurfa á henni að halda hverju sinni. "Það er mjög ánægjulegt fyrir okkur hjá Hjálparstarfi kirkjunnar á Íslandi að geta miðlað þessari gjöf áfram til samstarfsaðila okkar í Súdan" sagði Anna þegar hún tók við gjöfinni af Hjörleifi Þórarinssyni framkvæmdastjóra GSK á Íslandi. Að sögn Önnu er Hjálparstarf kirkjunnar á Íslandi lítil stofnun sem sækir styrk sinn meðal annars til samstarfstofnana eins og ACT sem ráða yfir breiðu hjálparneti um allan heim. "Í þessu tilviki vinnum við með norsku kirkjunni en hún er einnig innan ACT og rekur heilsugæslustöðvar á nokkrum stöðum í Súdan í samstarfi við súdönsku kirkjuna" segir Anna. "Gjöfin frá GLAXO er okkur mikils virði og við höfum orðið vör við að hjúkrunarfólkið er mjög spennt að fá þessa sendingu. Sýklalyfin koma að mjög góðum notum því þau hafi breiða verkun og nýtist því gegn mismunandi sýkingum." Hjörleifur Þórarinsson framkvæmdastjóri GSK á Íslandi segir að með skipulagsbreytingum sem gerðar voru á fyrr á árinu séu lyfjabirgðir á hverjum tíma nú í eigu fyrirtækisins hér á Íslandi og það geri því kleift að taka þátt í verkefnum með þessum hætti. "Það er ánægjulegt fyrir okkur að geta lagt lið á þennan hátt og verið fullviss um að aðstoðin skilar sér til þeirra sem þurfa mest á henni að halda".