Dregið í Meistaradeild: Hákon mætir Arsenal og Bayern

Sindri Sverrisson skrifar 27. ágúst 2026 15:47

Luis Enrique hefur leitt PSG til sigurs í Meistaradeild Evrópu tvö ár í röð. Getty/Mike Egerton

Fjöldi stórleikja er á dagskrá í deildarkeppni Meistaradeildar Evrópu en dregið var í dag í beinni útsendingu á Vísi. Hákon Arnar Haraldsson á fyrir höndum leiki við Englandsmeistara Arsenal og Þýskalandsmeistara Bayern.

Alls eru 36 lið í keppninni líkt og tvö síðustu tímabil og spila þau öll saman í einni deild. Fyrir dráttinn var þeim skipt í fjóra níu liða styrkleikaflokka og fékk hvert lið tvo mótherja úr hverjum flokki — annan á heimavelli en hinn á útivelli. Hvert lið spilar því átta leiki.

Átta efstu liðin í deildinni komast svo beint í 16-liða úrslit keppninnar og liðin í 9.-24. sæti komast í umspil um sæti í 16-liða úrslitunum.

Arsenal fær Mourinho í heimsókn

Úr efsta styrkleikaflokki má nefna að Evrópumeistarar PSG, Barcelona og Manchester City mætast innbyrðis. Englandsmeistarar Arsenal mæta meðal annars José Mourinho og hans mönnum í Real Madrid, og þýsku liðunum Bayern og Dortmund.

Liverpool var nokkuð heppið með drátt en mætir meðal annars Atlético Madrid og Inter. Norsku liðin tvö í keppninni, Bodö/Glimt og Viking, drógust bæði gegn Bayern og Atlético.

Leikjadagskrá liðanna í efsta styrkleikaflokki. Hvert lið fær átta leiki, tvo gegn liðum úr hverjum styrkleikaflokki og þar af annan á heimavelli en hinn á útivelli.UEFA

Man. Utd mætir Bayern og Atlético

Í 2. styrkleikaflokki voru meðal annars Aston Villa og Manchester United sem nú er með í keppninni á nýjan leik eftir tveggja ára fjarveru, og því í fyrsta sinn með eftir breytingar á fyrirkomulaginu.

United mætir Bayern og Atlético Madrid, sem og Roma, Sporting, Leipzig, Villarreal, Sabah frá Aserbaísjan og lærisveinum Cesc Fabregas í Como sem nú eru með í fyrsta sinn.

Leikir liðanna í styrkleikaflokki 2. Hvert lið spilar átta leiki.UEFA

Hákon mætir ensku meisturunum í London

Í þriðja styrkleikaflokki var meðal annars Lille, lið Hákonar Arnars Haraldssonar, sem mæta mun Bayern á heimavelli og Arsenal á útivelli. Lille mun einnig spila við Roma, Real Betis, Galatasaray, Bodö/Glimt, Slovan Bratislava og Stuttgart.

Leikir liðanna í 3. styrkleikaflokki. Hákon Arnar Haraldsson er leikmaður Lille.UEFA

Amin Cosic gæti spilað þar sem úrslitaleikurinn fer fram

Noregsmeistarar Viking, sem keyptu Amin Cosic frá KR í sumar, eiga krefjandi verkefni fyrir höndum. Þeir fá Bayern í heimsókn og sækja Atlético Madrid heim, á Metropolitano-leikvanginn í Madrid þar sem úrslitaleikur keppninnar fer svo fram laugardaginn 5. júní.

Viking mætir einnig PSV Eindhoven, Aston Villa, Feyenoord, Napoli, Stuttgart og Sabah.