Talið að milljónir mót­mæli Banda­ríkja­for­seta

Þetta er í þriðja sinn sem svokölluð „No Kings“ eða „Engir kóngar“ hreyfing efnir til mótmæla. Talið er að um sjö milljónir hafi tekið þátt í síðustu slíku mótmælum sem voru að mestu leyti friðsamleg. 

Skipuleggjendur segja að mótmæla eigi stjórnarháttum, dýrtíð í landinu og árásum Bandaríkjamanna í Íran. Viðburðir hafa verið skipulagðir í flestum stórborgum en búist er við því að fjölmennustu mótmælin verði í Minneapolis þar sem fulltrúar innflytjenda- og tollaefirlitsins ICE skutu mótmælendur til bana í janúar.

Tónlistarmaðurinn Bruce Springsteinn sem gaf í kjölfarið út lagið Streets of Minneapolis og er harður andstæðingur Trumps mun koma þar fram. 

Óvinsældir Trumps hafa ekki mælst meiri frá því að hann tók við embætti í annað sinn og samkvæmt könnun sem birt var í vikunni mælist hann með einungis 36 prósenta stuðning. Óánægjan er meðal annars rakin til hækkandi eldsneytisverðs vegna átakanna í Miðausturlöndum en aðgerðir Bandarikjamanna í Íran mælast afar óvinsælar.