„Takk fyrir mig Ís­land, mitt drauma­land“

Laufey gaf út þriðju plötu sína í fullri lengd, A Matter of Time, í ágúst síðastliðnum og hélt svo af stað í tónleikaferðlag um heiminn, fyrst mánaðarlangan túr um Bandaríkin síðasta haust og svo Evróputúr núna í vor áður en heldur til Asíu í maí.

Lokað var fyrir umferð í Kórahverfinu um helgina, Kórnum umbreytt í Laufeyjarveröld og spenntir gestir ferjaðir í strætisvögnum frá Smáralindinni. Rísandi stjarnan Elín Hall hitaði upp áður en stórstjarnan steig á svið og töfraði áhorfendur upp úr skónum.

„Laufey er kannski ekki að endurvekja djassinn í sinni hreinustu mynd, en hún er að gera eitthvað sem gæti reynst miklu áhrifameira: að gera heilan hljóðheim aftur spennandi fyrir nýja kynslóð. Tónleikarnir í Kórnum voru glæsilegt sjónarspil, músíkalskt afburðaverk og á köflum beinlínis heillandi,“ skrifaði Jónas Sen í fjögurra og hálfs stjörnu dómi sínum um tónleikana.

Ekki nóg með að áhorfendur fengju að hlusta á stórkostleg lög af nýju plötunni heldur lumaði Laufey nokkrum óvæntum bónuslögum að í lokin. Þrisvar sinnum sagði Laufey að komið væri að lokalaginu og í hvert skipti sem kom í ljós að hún væri að plata fögnuðu áhorfendur. Fyrst tók hún lagið „Second Best“ af Bewitched, síðan nýju smáskífuna „How I Get“ og loks söng hún á íslensku áhorfendum til mikillar gleði.

Lokalagið var „Draumalandið“ eftir Sigfús Einarsson eftir texta Guðmundar Magnússonar sem Laufey sagði vera eftirlætis lag foreldra sinna og lag sem hún hlustaði á þegar hún væri erlendis og saknaði Íslands. Fallegur endir á stórkostlegum tónleikum.

„Ég gæti ekki gert þetta án ykkar“

Laufey hefur ekki farið í nein viðtöl hérlendis um tónleikana en tjáði sig þó um tónleikana á samfélagsmiðlum í gær og sagði þar: „Takk fyrir mig Ísland, mitt draumaland.“

„Það er sannur heiður að fá að spila fyrir ykkur. Takk fyrir að fylla Kórinn tvisvar!! Takk fyrir að stíga inn í heiminn minn og fyrir allan stuðninginn! Ég gæti ekki gert þetta án ykkar ❤️ Ég óska þess að ég gæti sagt yngri Laufeyju frá þessari helgi!! Hún hefði ekki trúað þessu!! ✨“ skrifaði hún jafnframt.

Þá fylgdi texti með á ensku fyrir erlenda aðdáendur hennar þar sem hún sagðist hafa fengið að spila á tveimur uppseldum tónleikum í heimalandi sínu.

„Ég hélt tónleikana sem ég hefði þurft að sjá þegar ég ólst upp sem barn milli menningarheima og var að reyna að finna minn stað í heiminum. Ég setti alla mína æskudrauma inn í þessa tónleika og gæti ekki verið stoltari af þeim,“ skrifaði hún.