Svan­hildur Sif heiðruð

Svanhildur hefur undanfarin tíu ár rekið vistheimili fyrir barnaverndarþjónustu Kópavogs á heimili sínu. Þar geta börn dvalið hjá henni í lengri og skemmri tíma á meðan unnið er að bættum aðstæðum á heimili þeirra.

„Það hefur verið dýrmætt að njóta starfskrafta Svanhildar sem hefur lagt sig fram síðustu áratugina og opnað hjarta sitt og heimili fyrir börnum í viðkvæmri stöðu sem hafa þurft á skjóli að halda. Svanhildur fer á eftirlaun á nýju ári og óskum við hjá Kópavogsbæ henni velfarnaðar við þau tímamót,“ er haft eftir Ásdísi Kristjánsdóttur í tilkynningu frá bænum.

„Börnin eiga svo stóran hlut í hjarta mínu, ekki aðeins þegar þau dvelja hjá mér heldur um alla tíð,“ sagði Svanhildur við tilefnið.

Svanhildur er félagsráðgjafi að mennt. Hún stofnaði sumarbúðirnar Ævintýraland árið 1998 og rak þær til ársins 2012.

Svanhildur hefur starfað fyrir barnaverndarþjónustu með einum eða öðrum hætti frá árinu 2001 en það ár gerðist hún persónulegur ráðgjafi og stuðningsfjölskylda tveggja barna. Annað þeirra fór að endingu í varanlegt fóstur hjá Svanhildi.

Opnaði heimili sitt og hóf svo rekstur

Árin 2002- 2005 sinnti Svanhildur ýmsum störfum fyrir Velferðarsvið Kópavogs og opnaði svo árið 2005 heimili sitt og tók að sér að reka vistheimili fyrir barnaverndarþjónustu Kópavogs. Sinnti hún því hlutverki til ársins 2008. Á þeim tíma starfaði hún einnig sem tilsjónaraðili fyrir foreldra sem voru í þörf fyrir uppeldislegan stuðning. Samkvæmt tilkynningu hefur Svanhildur i gegnum árin einnig tekið að sér börn í fóstur til lengri og skemmri tíma auk þess sem hún hefur verið stuðningsfjölskylda fyrir börn.

Árið 2015 tók Svanhildur að sér rekstur vistheimilisins að nýju á heimili sínu og hefur rekið það samfellt fyrir barnaverndarþjónustu Kópavogs síðastliðin 10 ár.